★☆薇薇薇薇薇☆★

X’mas @ GZ

We wish u a Merry Christmas and a Happy New Year！

注：个“Year”字记得卷俐

我朋友百度百科话呢：“1850创意园由原华南最大的金珠江双氧水厂改造而成，占地5万多平方米，总建筑面积3万多平方米，由76栋错落有致的厂房车间组成。通过利用和改造旧厂房车间，打造艺术创作、设计、时常展览、文化交流、办公生活的品味空间。”

一入门口就见到用原本车间机器零件拼制而成嘅指示牌。

里面有各种类型嘅公司，各自有唔同嘅装修风格，行走其中似乎有穿梭时空嘅感觉。

公司门面各种有型！

园区里面都保留好多工业嘅痕迹，巧妙地转化中。

仲有各种艺术装置。

沿途各种小风景。

1850係旧城改造又一好例子。虽然依家仲係开发阶段，但係都值得大家到此一游。

值得一提，呢度距离信义会馆非常近，从正门出翻芳村大道向珠江隧道方向行，第一条街口转右入波场后街就可以直达信义会馆。

地址：芳村大道东200号

费用：免费

最近因为DoDo姐有份主持电台节目嘅《口水多过浪花》提起过《表姐，你好嘢！》系列电影，于是搵翻嚟睇！唔睇由凸只一睇由凸只！呢种咪就係失传已久嘅港产喜剧咯！旧年曾志伟话特登想拍翻嘅港产喜剧《我爱HK开心万岁》都无呢种感觉！

《表姐》系列有四集，贯穿其中嘅始终係嘟姐同表哥兼导演张坚庭，同埋嘟姐嘅歌唱表演！包括第一集嘅两个党派歌曲对唱，第二集嘅《欢乐满东华90》，第三集喺吴国敬歌迷会上唱《windflowers》，第四集嘅《禅院钟声》英文版！爆笑！必睇！

唔知係先入为主，定係真係好睇，第一集确係最精彩嘅！社会主义同资本主义，中国大陆同香港台湾，太多极端太多冲击太多笑料！似乎句句台词都可以进一步解读，阴谋论啊阴谋论！而且嘟姐同梁家辉嘅感情线好细腻。嘟姐仲凭呢出戏获得第十届香港电影金像奖最佳女主角奖！

第二集嘅男主角就明显鸡咗好多，角色亦不讨好。

第三集出现台湾金马影帝陈松勇咁可爱嘅角色，同埋黄秋生咁cool嘅政治部成员，似乎又好睇翻。

第四集有外国嘅好朋友河国荣。前排至突然谂起呢个外国人，好似有乔宝宝同阿一之后，河国荣少咗喺TVB出现。而嘟姐都少咗大陆女公安嘅霸气，变成一个花痴。仲有三姑嘅本色演绎。

以前睇完电影我都想写啲嘢，后尾因为我自己越嚟越懒，无写了。今铺睇完《表姐》咁精彩嘅表演，忍唔住一定要写，正所谓：“口水多过浪花，遇到嘟姐阿叔大赞”

赞！

我只能写到呢度，更深入嘅影评，可以参考我嘅朋友维基百科，太多敏感词啦，贴唔出嚟。请自行前往围观。

冬天瞓觉嘅时候，将棉胎卷落脚底，阿嫲话呢个铺士叫“打被兜”。

天冻啦，大家瞓觉嘅时候记得打被兜！暖好多咖！

 “海上生明月，春来发几枝”当我行到海边嘅时候，就不禁吟起呢两句诗！係咪好有文采呢？！

我真係好中意呢张相，15秒快门，第一次影得咁靓！佳能，感动常在！感动埋我自己！

海边无乜光污染，望过去大海漆黑一片，抬头望上天，个月光比平时喺广州见到嘅大两倍！是两倍哦亲！！！

除咗月光，仲有好多星星！好似唔小心整跌咗，撒喺天上嘅闪粉！终于明白星之碎片係点样样嘅意境！可惜我部相机太鸡，影唔到。

夜晚嘅红海湾除咗海浪声同风声，就咩声都无……就奇啦！

凡係海边旅游区都係越夜越精彩，烧烟花，放孔明灯，跑嚟跑去，乜都有！

现场睇烟花真係好靓！佢哋真係一朵花，一朵转瞬即逝嘅花！

早晨嘅红海湾更加充满活力！

有六点起身谂住影日出但係都係迟嘅游客，有晨运嘅阿叔，有吹海风嘅情侣……

最劲嘅係有一个钓鱼嘅阿伯！我觉得佢好似一个武林高手咁，行喺太阳初生嘅海边！拍戏咩，咁有型！

咁大浪，阿伯依然将条鱼丝掉入大海，唔知佢有无收获呢？！

第二日早晨仲係有雾有水汽，成个太阳化开晒。

阳光洒喺海面上，金灿灿，靓到无朋友！

仲用三脚架影咗几张全景相！

每次去到沙滩都有咁样嘅感觉：第一眼见到大海，觉得心旷神怡；听住海浪声，觉得好悦耳；踩喺软绵绵嘅沙滩上，觉得好舒服；然后一路行一路行一路行，觉得啲浪好嘈，啲浪花冚埋嚟，咸咸湿湿咁，对脚陷入啲沙度越行越攰……

不过，每次离开沙滩都係一万个不愿意，下次，下次再嚟过！

红海湾位于粤东汕尾市，距离广州约300公里。

根据旅行社嘅安排，我哋中午先去位于鲘门镇嘅后门饭店食饭！食字都食饱啦咁！

饭后直奔“南海观音旅游风景区”，相传呢度係观世音得度成仙嘅地方。

呢度係一个典型嘅人工风景区，各种雕像，各种佛像，各种香油箱……

而作为一名有礼貌嘅游客，我多少都会添啲香油嘅。

对出海面嘅石头、浪花、延伸到我视线范围之外嘅水平线至係最吸引人嘅！

第一日去到红海湾由于啱啱打完风，天仲係灰色嘅，影出嚟嘅相都係麻麻地。

第二日就劲啦！个天蓝到你唔信！太靓！影咗太多相！唔知点样取舍！

红海湾有两个滩，无论吹咩风，都有一个滩大浪滔滔，一个滩风平浪静；一个滩动如脱兔，一个滩静如处子。

我哋无聊，行行行，行咗去游艇俱乐部。呢度係石滩，有好多船仔。

行嘅话，当然係沙滩好行，但係讲到影相，都係石滩靓啲！

红海湾尚算係一个干净嘅沙滩，因为我哋见到蟛蜞仔，一只係生嘅，一只係我即席挥毫嘅，多谢！仲有好多贝壳喺沙滩！

红海湾係一个好crazy嘅沙滩！有骆驼行嚟行去；有载人飞行器飞嚟飞去；有烧烤档烧嚟烧去！Unbelievable！

海边嘅主食当然係海鲜，鱼虾蟹唔少得！仲有贝壳类海产都好肥美！喺呢度食到人生第一碟海胆炒饭！好味！

10月4号，时隔半年，滩叔又喺联合书店搞《欧多芽》签名会。

《欧多芽》唔係一本旅游天书，係一本贴咗好多旅游相嘅散文书。我觉得《欧多芽》好睇过《捞碧刁》！

今次滩叔讲嘅嘢唔多，佢话要留翻时间逐个签名嘅时候倾计喎。

我问滩叔，你啲相係边个帮你影咖？佢话：“我自拍咖，你都试下！”

果然，佢逐个倾计之余，仲喺每本书上即席提翻一两句金句。

些些滩叔私人醒嘅金句！

些些滩叔精彩嘅《欧多芽》！

些些敏又帮我影到咁靓！

些些联合书店搞咁多签名会，虽然我无帮衬过，但係我会搵机会报答你哋咖啦！

趁住国庆假期，去咗斥巨资打造嘅“广州国际灯光节”，好靓好靓好靓！

现场有好多灯，路边有好多凳，可以营造“灯灯灯凳”嘅紧张气氛！

好啦，上图！

从南往北，从海心沙往黄埔大道方向行，第一眼就会见到煲到好大嘅“生命之树”！扮《阿凡达》嘅灯光榕树！主体会变色，有啲光纤垂落嚟扮榕树嘅须须。

仲有用广州塔塔身设计作为树干，有印花嘅另一款生命之树！

呢块喺水上嘅金色叶，係我对灯光节嘅第一印象。灯光节开幕当日，《广州日报》就係用咗呢块叶做新闻图片，于是我决定要去睇！

最吸引人嘅係花城广场桃花岛上嘅“水中光树”同“微光草海”，好靓好靓好靓！

下面呢啲真係靓到不能，我要一张张放上嚟！

电视塔同IFC做背景，哇，靓！

喺呢度影咗好多好多好多相！

除咗上面呢啲，喺歌剧院旁边LED屏幕有沙画，歌剧院嘅外墙有手影戏、皮影戏嘅投影，最劲係博物馆同图书馆外墙有裸眼3D！条片好短，但係都几精彩！真係可以裸眼3D！

我旁边嘅卡片机人都影咗好多靓相，仲有数码滤镜将灯光变成其他形状！

温馨提示：

1、现场嘅环境係咁嘅：花城人人人人人人人人人人灯人人人人人人人人人人灯人人人人人人人人人人灯人人人人人人人人人人灯人人人人人人人人人人广场。带小朋友同老人去嘅朋友小心啲。行咗一阵就听到几次现场开咪搵细路。

2、用卡片机嘅朋友记得带三脚架，如果你够醒目（好似我咁，嘻），就搵位放定定部相机，如果唔係，全部都一pat嘢！

时间：即日起至10月15号每晚8点至11点

地点：花城广场、海心沙、广州塔

费用：花城广场免费，其他地方好贵

今个星期连续几晚都落雨，或大或细。

老豆话呢啲就係“秋临夜雨”，到咗秋天，日头好晒好热晒到啲植物干晒，夜晚就会落雨润一润。“随风潜入夜，润物细无声”嘅除咗春雨，仲有秋雨！

中秋节假期，联合书店连续举办咗三场签书会：余迪伟、卓韵芝、王贻兴。我一本佢哋嘅书都无，但係我去晒三场签书会，或者话係分享会。三个分享会各有各特色：迪伟，一如既往地肆无忌惮；阿芝，充满欢笑嘅girl's talk；贻兴，一位真正作家嘅分享。

●══════════════════════════●

迪伟好有心，带咗五件《爆响口》嘅Tee过嚟送畀广州嘅朋友，但係要回答佢嘅问题。

第一个问题就嚟料：“讲出五个性器官嘅名称。”见到大家面有难色就改成hea题目：“我两本书其中一篇文章嘅题目。”果然点样嘅DJ就有点样嘅听众，后尾都係有人答到佢第一个问题。

迪伟透露，已经有投资者同佢地倾《爆响口》喺广州公演嘅细节，尺度方面呢，可能大过香港。迪伟，你太唔了解大陆国情了，不过都希望可以快啲睇到！

签书会完咗，见到佢戴住副超同佢朋友喺四楼睇嘢，佢身边有几个大只肌肉男朋友，正啊！

●══════════════════════════●

阿芝好靓，着短裙+长款西装嚟广州见我哋。自从姖离开商台，我就觉得姖走偏锋，行紧一条非常规嘅路。今日见到姖，原来姖一直畀我嘅感觉无变，依係好少女，好爽朗，好开心，好好笑嘅少女！

正如姖自己所讲，希望自己嘅一生有唔同嘅体验，尝试唔同嘅道路。

好中意阿芝分享姖婆婆嘅事，原来婆婆至係《死去活来 One Night Stand》灵魂人物！

中意阿芝嘅朋友仔嘅谂法都好相似，提问环节其他人问嘅两个问题，我都好想知道：

1、会唔会翻商台？阿芝话，暂时唔会。要翻去嘅话会以一种新嘅形式回归，唔会单纯咁翻去重复以前嘅工作。

2、芝see菇bi family会唔会再出？呢个问题我最想知！阿芝问我哋知唔知边个係苦荣小苦妹，百几个人一齐答：知！姖暂时未谂到苦荣小苦妹以咩形式再出现翻。其实，我觉得，出翻啲小短篇都好啊！

●══════════════════════════●

可能因为媒体采访需时，可能因为11号就得贻兴王一场签书会，佢迟咗二十分钟出现！贻兴以白马王子look出现，紧身背心打底，白色长裤，白色外套，白色cons，加上佢嘅招牌笑容！确实又高大又靓仔！好中意一位读者嘅形容：“原来靓仔係无死角嘅！”但係佢一出现就猛咁抹汗！佢已经变成一个肥……啊，唔讲得！佢已经变成一个大只仔！唔知佢平时係唔係都係紧身衫+满面须根+腊头look去教班咖呢？吓亲啲塞豆窿！

继续果然係点样嘅作者就有点样嘅读者，同之前迪伟阿芝相比，到场嘅朋友仔都係斯斯文文，个个都好文艺青年feel！

我都觉得贻兴王係好有坚持嘅一位作者，电视台节目主持外人睇嚟可以获得咁多掌声嘅事业佢可以毅然放弃，选择继续执笔爬格仔，佢係有几咁中意文字几咁中意创作！

佢都简短咁讲咗佢嘅创作经历，要耐得住寂寞、无晒朋友、死写烂写赶交稿。当然，体验生活好重要。佢希望好似村上春树咁可以去唔同嘅地方生活一段时间，获得创作嘅灵感。

经过呢个分享会，更加觉得贻兴好文艺，唔明白佢点解可以同少爷占咁骑嘅人做到朋友！╮(╯_╰)╭

●══════════════════════════●

三个分享会里面，我觉得体验係最重要。我记得睇电视介绍过一位身患癌症嘅病人四出旅行，到最后癌症痊愈嘅故事。主角讲过一句话令我一直记住：“既然不能延长生命的长度，就要拓宽生命的宽度。”体验，尝试唔同嘅人生。共勉之。