★☆薇薇薇薇薇☆★

舞台王者终于嚟广州开show啦！

利益申报先：我曾经係阿王嘅超级fan屎！我依家係阿王嘅一般fan屎，都仲算係fan屎！

阿王啲歌唔净只係歌咁简单，好多歌都乘载住我啲回忆。我呢排煲佢啲歌，好多嘢都涌翻出嚟，我真係惊我到时睇睇下会喊出嚟！

所以呢，呢篇嘢，我谂咗好耐，应该摆喺“All About Music”定係“八十年代人想当年”。最后我都係决定摆喺“想当年”呢个分类下边，我谂好多同我一样八十年代出世嘅朋友仔，应该同我一样，对阿王有一份特别嘅感情。

讲讲我同阿王之间啲二三事先！

时光倒流到2个星期前，我上网，上上上，见到“郭富城舞林正传广州演唱会”2009年1月3日在天河体育场举行！Wow！我即刻打电话畀另一个阿王fan屎：

我：“喂！阿王嚟广州开演唱会啊！明年1月3号！”

另一个阿王fan屎（以下简称“屎”，哈！）：“去！”

我：“去！”

时光再倒流到3个月前，一个晚上，我同屎讲一个无聊电话：

我：“喂！阿王去佛山开演唱会喎！”

屎：“係啰！最衰喺佛山开呀，夜晚开，睇完都唔知点算！”

我：“係啰！点解喺佛山开呢，同广州差啲啲，都唔嚟广州开！”

屎：“係啰！好想睇下佢个360度旋转舞台，听讲好鬼劲！”

我：“係啰！我都想睇！不过我哋做咗佢fan屎咁耐，都係时候睇下佢嘅演唱会！唔知佢会唔会再嚟广州开呢？”

屎：“应该唔会喇，喺佛山开完，广州咁近唔会咁快又嚟开嘅。”

我：“係啰！我都係咁话！”

屎：“係啰！”

……（下删九万字）

时光再再倒流到6、7年前，我对我好朋友“尽诉心中情”嘅时候：

我：“如果我第日开间铺头，我会喺铺头度全日净係播郭富城啲歌。”

好朋友露出惊讶之情，但为咗畀面我，喺半秒之后收翻，镇定咁应咗我一句：“哦！”

事件一：作为初中鸡嘅我，同之前提到嗰位阿王fan屎倾阿王，倾倾倾。姖借咗饼阿王嘅《风里密码》录音带畀我，我听听听。之后姖送咗饼带畀我！我觉得呢饼带啲歌，係阿王最好听嘅慢歌精选！啲相又靓！我keep到依家咖！虽然我依家都唔知去边度揾部录音机播嚟听，虽然就算播都会跌啲磁粉出嚟，虽然我嗰时唔明咩係“寂寞会冻，旧情会痛”，……

事件二：我记得阿王首《风里密码》係信用卡广告嘅广告歌嚟嘅，呢个信用卡广告入边有一个镜头係阿王开住部车，然后挡风玻璃反光睇到啲树向后退（因为阿王开住部车向前呀嘛）。我试过用walkman听住《风里密码》坐喺双层巴士（当时广州係有双层巴士，我仲记得係528号线添）嘅第二层，懒有feel咁睇住啲树都係向后退。奈何广州啲景唔多掂，巴士二楼仲时不时刮到马路两旁嗰啲树枝，一个唔留神分分钟被刮到双目失明，仲边树得闲懒有feel呀！

事件三：仲听walkman嘅年代，每逢考试日前一晚，我会将饼录音带倒到《强》嘅位置，到考试嗰日一起身，一揿个play掣，就“虽跨多少个山”，懒係激励自己咁啰！呢个习惯都维持咗一两年。托赖，咁多次考试都无点失手过！

事件四：我记得我用阿王嘅《渴望无限》嚟试一部disman，首歌intro部分係有电流声嘅（呢啲先至係“电子音乐”啊，直情畀电流声你听！），我以为部disman唔得，仲懒醒咁同人讲：“喂！唔係喎！部disman唔掂喎！有电流声嘅！”哈！谂起都好笑！

事件五：逢星期六日TVB有大show做，都尽量坐喺电视机前面，及实部电视。一有阿王出场就好似中咗降头咁，眼都唔眨叮住部电视直至阿王表演完。

事件六：嗰阵时有铺瘾，中意用录音机录歌，录电视播嘅歌。一有歌，唔该全家安静，畀我录歌！

事件七：阿王喺98年度TVB劲歌金曲嘅“最受欢迎男歌手”，阿王一首《这夜心情》，唱到眼湿湿，我都睇到眼湿湿！老老实实，我依家都唔明我当时眼湿啲乜！咩苦都未挨过，但係就懒係明白阿王啲辛酸咁！

私人珍藏阿王录音带六盒！

1、早喺95年，阿王喺《你是我的一切之春眠篇》rap《春晓》！阿王rap得唔错喎，的确够in！关耀哥学下啦！仲梳all back头，rap到爆青筋！

2、我好希望Mini嘅《叱咤乐坛》可以请阿王上去，解释翻《失忆（谅解）备忘录》呢个歌名嘅意思啰。

3、我发觉我对音乐嘅包容性越嚟越低。以前《个个赞你乖》都觉得得嘅，而且当时又真係hit爆咖喎；后尾嘅《水手装与机关枪》连个名都接受唔到！其实《水手装与机关枪》係个名衰啲啫，实则首歌都几阿王style。阿王都尝试过几多类型嘅歌，快歌、慢歌、励志歌、惨情歌、骑离歌、……

4、依家喺舞台上好似阿王咁唱得跳得嘅男歌手，好似真係无啰。反而女歌手我觉得容祖儿就真係得，唱得跳得，有阿王九成功力，（都係嗰句啦，纵使我真係唔係好得容祖儿，但客观啲嚟讲）抵姖红嘅！

朱薰E正音时间：

郭富城嘅“郭”字係读gwok3，唔係“角”（gok3）！读嗰时千祈唔好食咗个“w“音！唔好将：国（gwok3）、光(gwong1)、广(gwong2)、过（gwo3），读成咗：角（gok3）、刚（gong1）、讲（gong2）、个（go3）！OK？！

朱薰E正音练习：

郭富城同郭芯琪各自都有角色，郭富城演只台角，郭芯琪演只墙角，两个角色都好觉眼咖！

 

呢个玩具，我哋叫佢做“百宝盒”。係我小学年代最hit最中意嘅玩具！我记得百宝盒分两种size，一种係我呢个，比一个一蚊硬币大啲啲，有条绳可以挂喺条颈度，都几“型in wave”咖，入边有一个人仔；一种有手板咁大，入边一般都有两个人仔。

无论大定细，当时几乎每个女仔都拥有一个。

每个盒仔係一间屋，一间有主题嘅屋。我呢间，有HiFi、有大电视、有唱碟机、有cassette机，啲黑胶唱片hea到一地都係，……其他嘅主题包括豪宅、医院、课室、游乐场、……自己一个百宝盒无乜好玩，当几个百宝盒放埋一齐，几条友就会自编自导攞住啲公仔行嚟行去。串门啊、倾计啊、上课啊、睇医生啊之类，自己玩到不亦乐乎！细细个就係玩啲咁无聊嘅嘢咖啦！

我已经唔记得呢个百宝盒几时买喺边度买。今日至赫然发现，盒仔底写住“HONG KONG”。都係嗰句啦：都几“型in wave”咖！

以前听讲过，一个人突然想食啲乜，就表示佢体内缺少咗果样嘢所提供嘅营养元素。例如，突然想食水果可能缺维生素，诸如此类啦！

有一晚刷牙嘅时候，我突然谂起华丰三鲜伊面嘅味道，突然好想食！可能我体内缺少咗即食面最多嘅——防腐剂！个人唔化！

同我一样，依家廿零岁嘅朋友仔，肯定或多或少被华丰果种即食面味吸引过！上世纪八十年代到九十年代中，华丰方便面简直风靡全中国！

即食面呢啲咁好味又超无益嘅食物，向来係细路仔嘅“禁品”！我孩童年代都一样，好少食，所以每次食都觉得好好食！虽然依家市面上有好多牌子嘅即食面：康师傅、统一、出前一丁、……但係我到依家，最中意嘅始终係华丰！华丰三鲜伊面！黄色袋果种！我觉得，华丰好味之处係因为佢有即食面嘅香味之余，佢嘅味粉唔会有其他牌子嘅咁浓味！

喺我记忆中，华丰除咗佢嘅好味道畀我留底咗深刻印象之外，仲有佢果句好劲嘅广告词：“食华丰，路路通”！押韵之余仲寓意深远！

虽然“食华丰，路路通”，但係华丰近十年嘅路就行得好崎岖！

无论如何，祝福华丰！因为我真心中意食“华丰三鲜伊面”！因为“食华丰，路路通”！

20世纪80年代，日本任天堂公司推出经典嘅“Family Computer”，因为佢嘅外形係红色同白色，所以我哋个个都叫佢“红白机”。80年代出世嘅小朋友，喺家庭条件负担得起嘅情况下，无论男仔女仔，个个屋企都可能有过一部红白机吧。

红白机一定係我哋呢一代童年回忆里面，最重要嘅部分之一。好多经典游戏，无论係一个人喺屋企消磨时间，定係同同学仔、朋友仔一齐嘻嘻哈哈，肯定个个谂番起，都可能忍唔住嘻一声笑出嚟。（依次顺住图片嘅从左到右从上到下写落嚟）

当时啲游戏通常都係英文名，我真係读得书少，唔识。于是，除咗好出名嘅游戏，或者人哋话畀我知嘅游戏有中文名之外，其余嘅都係我自己帮啲游戏改嘅中文名，所以有时同人哋讲起，都有啲难度。

绝对称得上係经典之中嘅经典！

当时，玩得最多嘅，係第一代嘅《超级玛丽》。我从未玩爆过机，觉得几难玩！所以头几局玩过无数次！有啲明明无嘢嘅地方，跳下，可能会顶到菇；有啲砖块，顶多几下，可以出多几个金币；有啲水管，痞低就缩咗去一个满布金币嘅地方；踩瓜只龟，一推，就扫低啲晒旁边果啲菇；每关最后，行上个跳台度，跑跑跑，跳，摘低支旗；……我自己觉得最好玩，就係游水果啲关卡！唔知有咩好玩，就係觉得好特别，画面好鲜艳，音乐好好听！

除咗玛丽，游戏入边果啲行嚟行去嘅菇、爬嚟爬去同埋时不时会飞嚟飞去嘅龟，造型都十分得意！好适合畀小朋友玩！

一直到依家，玛丽都仲係任天堂公司新游戏中嘅主角！

红白机嘅超级玛丽出咗一、二、三代，之前仲有过《水管玛丽》同《大猩猩》（人哋叫《大金刚》）。我觉得《大猩猩》都几不雅，有一关係玛丽用啲唔知咩嘢挤只大猩猩嘅patpat！

记忆犹新嘅“上上下下左右左右BABA”！

魂斗罗係我自己打爆机次数最多嘅游戏！一二代都爆过。当然，係用咗“上上下下左右左右BABA”厄咗30条命在先啦！

唔知点解会觉得魂斗罗呢啲咁男仔嘅游戏好玩。可能因为佢容易过关同容易爆机吧！当玩超级玛丽果啲玩嚟玩去都爆唔到机，次次都含郁而终嘅时候，就要攞饼魂斗罗出嚟爆爆条气先至顺番。

没完没了嘅游戏！

我最记得，放暑假嘅时候，同表姐玩。两条友玩玩玩，玩到大家都有廿条命，攞晒最紧嘅武器，可以一下就打烂啲钢（白色果啲墙），可以扫草坪，敌方啲坦克一出嚟，我哋两个就扫爆晒佢！玩到我哋好雀跃，基本上係无敌咖啦！最后，我哋係自己打烂只鹰嚟game over咗佢。因为当时已经係夜深啦，我哋被大人驱逐番房瞓觉！鬼叫我哋当时仲係小学生咩！

坦克有一个选项，係可以畀玩家自己设计场地。我哋好中意用钢围住只鹰，实无死咖；再铺一排刚喺中间位，掩护自己；其他地方铺雪地（白色、好滑果啲），方便有嘢攞果时可以冲快啲！呵呵呵！讲起坦克就兴奋，唔单只可以没完没了咁玩，斋讲都可以没完没了！

最益智红白机游戏！

俄罗斯方块係一款可以锻炼小朋友嘅辨色、空间感、快速判断、计算等能力嘅综合益智游戏。而有俄罗斯特色嘅衬底音乐，同时亦可以提高小朋友嘅音乐欣赏水评。每次玩，最期待嘅就係过关嘅时候，中间会有啲人仔出嚟跳舞！有啲就hea手hea脚，有啲就打关斗，……应有尽有！当睇到六格都有人仔，就最开心！不过一直搞唔明，点样至出得晒六个人仔。

俄罗斯方块绝对係一款从三岁到八十岁都岩玩，而且长盛不衰嘅经典游戏！

唔可以用常理谂嘅游戏！

呢个游戏我最记得就係我可以用我自己部摩托车个后碌片人哋个前碌，片低人哋，自己又无事！啲人仔（赛车手）跌低咗，后边啲车照样开过嚟，碌过啲人仔，但係啲人仔照样无事，跑番去自己部摩托车度，开番车。真係好搞笑！

佢同样有得玩自己设置赛道，我就会设置几个大斜坡，係咁飞车，爽！

我最中意玩赛车游戏，呢个赛车游戏都係我最中意玩嘅赛车游戏之一。操作简单、赛道简单、规则简单。

几矜玩嘅一个游戏。上边果啲大蜜蜂会跌啲针落嚟；又有啲蜜蜂会飞落嚟袭击架飞机；唔知点样，只飞机就可以升级成可以发双行子弹；到奖励关卡，啲蜜蜂会排住队出嚟畀你射；……

我记得有跳火圈、走钢丝（跳过啲马骝仔）、踩波车同埋荡千秋。跳火圈同走钢丝基本上无乜难度，係有时啲马骝仔会排得好密，点跳都瓜柴！踩波车就中等难度，最难嘅就係荡千秋！一开始，个人仔就喺个千秋上边，要飞落个弹床度，喺弹床弹起抓住下一个千秋！我记得我玩咁耐，净係试过一次成功fing到一个千秋！

我觉得同超级玛丽好似，将啲宝箱换成蛋，将菇同龟换成蜗牛之类嘅怪物啫。最搞笑就係个人仔会畀嘢kik亲，向前扑一扑！

两只松鼠从卡通到游戏再到番卡通，真係几乎搏所有女仔嘅好感！最好玩就係两个人玩嘅时候，一个攞起个苹果掟另一个，会掟到人哋晕得一阵阵！真係好得意！

玩炸弹人最尴嘅就係，set好咗个炸弹喺自己左边，右边又有个气球飘紧过嚟，自己夹咗喺两幅墙之间，死路两条！死得好尴！

我谂，呢个游戏应该係源自于“三只小猪”嘅故事。有大灰狼要食小猪，啲小猪点样奋勇抗敌。我记得大灰狼嘅走向都有两个，一个係从下面用气球升上上面，升得多大灰狼就够力推旧大石落嚟，压死啲猪仔；另一个都係用气球从上面降落，成功降落嘅大灰狼就会上猪仔果栋楼，喺个篮果度只猪仔经过就会食咗佢。

虽然叫“猪小弟”，但係我觉得似羊咩多啲！

果个人仔攞到金之后，可以喺另一个放番低啲金，我老豆问过：点解佢喺果度屙S？仲有果班敌人会冤魂不散咁係咁追住嚟！

要跳起用个锤子揼开上边啲冰砖，一层一层咁上，又要避开啲企鹅同雀。不过啲公仔造型都好得意，所以我都几中意。

我次次玩呢个游戏都好惊！我觉得呢个游戏好刺激！一味喺度走走走，食食食，赶赶赶！

我好少玩呢个游戏，净係记得要食菠菜同埋接住佢女朋友飞落嚟果啲心心。

係用手枪玩嘅。我到依家都唔明，当时点解会有咁高科技嘅游戏，同埋究竟用咗咩核心技术！而且当时唔识玩，将支枪贴住部电视，实中咖！

两条友对打，具体都係唔係太记得！

呢个游戏，就係喺度猛咁跳跳跳，攞住把剑係咁砍砍砍，都唔知做咩！

经典射击游戏，都係玩得唔多，唔係太记得。

我唔知呢个游戏係咪就咁叫“古巴”，但係我一直咁叫佢！我中意佢啲人仔好得意！个游戏好似係救下人质之类吧，哋经常射死敌人之余仲射死埋人质添！好搞笑！

都係救人质游戏，啲人质会上我哋自己部坦克。如果坦克被射散，啲人质都会四散。譬如救咗10个人质，四散嘅只有8个左右，然后有命嘅，要马上用部坦克接番佢哋，如果唔係，佢哋四围走盏又畀人射死咖啫。

我曾经有一段时间经常玩。我老豆又问过我：做咩佢玩口水？佢的确係玩口水嘅。仲高章到可以用自己吹出嚟嘅口水泡借力向上跳添！

当时净係识用力督个白波，旨在求其将所有波督入袋。完全唔知有顺序呢样嘢！

最记得开始係从一艘军舰上边起飞，然后不断扫爆晒其他飞机。

净係记得玩过呢个游戏，开头嘅画面係黑底，有个女仔行到屏幕中间，敲响个铜锣。同后边嘅射击环节完全唔match！

係咪唐老鸭个friend？都係超级玛丽类嘅打怪物游戏，难度比较大！

当然，我知道仲有好多款游戏，好似《热血系列》、《洛克人》。但係，上边呢啲係我玩过、印象比较深刻、而且几中意嘅游戏。红白机真係经典之中嘅经典，讲起就开心！于是一口气写低三千几字，同大家分享下！

零食，又叫“口‘立’湿”，係发牙痕时嘅必备佳品！小朋友时代当然会食唔少零食，从幼儿园番屋企、从小学番屋企、去医院睇病、放假去公园玩，肯定要扭计买啲零食塞住把口。我记忆中有好多好中意食嘅经典零食，可惜大部分已经消失咗，好彩仲有啲奇迹般生存到依家。你又记得几多？

1、奇多××：××我已经唔记得係咩，我印象最深刻嘅就係果个当时风靡少男少女嘅“奇多圈”。浮雕式塑料圈，背景係各地标志性建筑，前景係“奇多豹”。

2、康康蔬菜饼、多拿虾片：又係对呢两种食物无乜印象，净係记得唔知其中边个係送个圈嘅，用条绳穿住，拉下拉下，个圈就转下转下。唔知有几过瘾呢，当时就係中意係咁拉下拉下转下转下。

3、小浣熊即食面：买咗之后，连滚水都唔使落，揸碎就食得。名副其实，即食面！不过我自己少食。

4、咪咪虾条：五豪子一小包，细细条橙色嘅。记得旧年，为咗纪念佢，我仲喺春之花买过一大包，然后无人食，放到淋咗添。

5、卜卜星：经典之中嘅经典。不过硬係觉得佢无乜嘢到，真空包装之余，连粒卜卜星都係真空嘅。

6、牛肉干、斋烧鹅：都係用透明袋装住，上面用块纸皮夹住，然后钉两个订书钉封口。简陋嘅包装畀我留下深刻嘅印象。

7、沙爹鱼串：金黄色嘅，应该用咗好多味精同色素将啲无闻无味嘅面粉块调到好好味，然后用支竹签督住。

8、鱼皮花生：同依家嘅鱼皮花生味道都係差唔多，以前有一种熟口熟面嘅牌子嘅，不过印象唔係好深。

1、七星果冰：我嘅至爱！有好多种颜色、好多种口味嘅水果硬糖。因为紫色少见，当时觉得紫色特别好食。食真啲，其实係最普通嘅红色或者绿色好味啲！之后再都揾唔番一种水果糖可以媲美七星果冰嘅味道。

2、大大泡泡糖：红色包装嘅。曾经试过将包装纸做成纹身贴纸。

3、棉花糖：学校附近通常都会有个大叔，踩住部类似马达嘅棉花糖机整棉花糖。用只竹签督住，对住一大旧棉花般嘅棉花糖无从入口。试过因为大风，成旧棉花糖吹散咗，揸住支竹签，望住四散嘅棉花糖，唔知点算！

4、麦芽糖：都係学校附近嘅大叔，有一个炉仔，仲有石板。将麦芽糖煮熔，倒喺冻嘅石板上面，仲画埋画添！加支竹签，等麦芽糖冻咗凝固咗之后，就食得！有啲为咗增加刺激性，仲整一个转盘，转盘上係各种图形，转到边个就整边个。

5、爆炸糖：细细包，一小粒一小粒好似砂糖咁细嘅，放入口，会感觉到吡吡嘭嘭好似爆炸咁。

6、大白兔糖：全称应该係“大白兔奶糖”吧。又甜又有奶味又唔漏！

7、啫喱杯：当时无喜之郎呢啲牌子嘅，不过依然好食！仲记得幼儿园嘅时候，食完啫喱，用啫喱杯做灯笼挂喺课室度添。

1、益乐宝：乳酸类饮料，醒胃又有益，最岩小朋友饮！后来类似嘅就係“你今日饮咗未”嘅益乐多。

2、沙士汽水：我唔中意饮，因为我觉得佢係一阵万金油味，不过当时好hit。

1、公仔雪糕：个雪糕係一个公仔头嚟嘅。我记得好好食！不过唔见咗。

2、莲花杯：又叫雪糕杯。细个嘅时候係因为我食雪批食得慢，融咗会滴到成身都係，所以多数会买莲花杯等我自己“不不”吓。依家五羊仲有雪糕杯。

3、雪糕砖：真係一旧砖咁嘅，当时卖个半定两蚊咁上下。通常一个雪糕砖有两种味。几抵食。

4、棒棒冰：一条类似双节棍，可以从中间啪断，又可以喺佢个头剪个窿，啜住嚟食。其实，係一啲有色素嘅糖水雪成冰。

1、山楂饼：送凉茶必备，一筒十块左右吧，用纸卷住。

2、陈皮：仲要係佳宝陈皮，都係用嚟送凉茶嘅。

3、肚脐饼：下低係一个圆碌碌嘅饼干仔，上面用啲甜嘅唔知咩嘢挤成一个类似屎嘅形状。食嘅时候通常食下低旧饼先，再慢慢品尝上面嘅糖。

4、字母饼：将廿六个英文字母做成饼干。到依家都觉得好有趣！