★☆薇薇薇薇薇☆★

几个星期之前充满期待地睇咗，谂住呢个阵容仲唔係“我最喜爱的电影”？！点知睇完Ｏ咀Ｏ咗几个星期至写到出嚟。

估唔到期待已久嘅《保持爱你》係一出咁crazy嘅电影，尤其係结尾！同之前叶念琛嘅电影一样，喺结局度吓你一跳！电影由5段发生喺情人节嘅故事组成。

Crazy第三位：森美。桥真係好旧，开始话自己有个孖生哥哥到处欺骗少女啲感情！结局竟然用翻森美自己嘅《森之爱情2电灯胆》嗰招！日曦同月升，死咗一个，然后生嗰个帮死嗰个完成心愿！

Crazy第二位：唐素琪。哇！姖上楼再落楼嗰下真係好震撼！可惜车路士啲戏好似当年嘅方力申，晶哥话斋：“净係用把口嚟做戏！”

Crazy冠军：最crazy嘅梗係艾粒同Miki嗰段啦！而最最最crazy嘅，就係剧中艾粒喺屋企供奉住一个“Theresa女神”，黐孖筋！

当然，侧田同Stephy、梁祖堯同谢安Kay，呢两段故事都几爱情小品嘅！尤其係Stephy对住块镜练讲嘢，镜后嘅Kay睇到喊晒一段，好心酸！

侧田同Stephy一段，配埋《三十日》，好温馨！《保持爱你》真係倾尽几乎所有金牌嘅artist！连RubberBand都要上阵！侧田做街show唱《三十日》，见到泥鯭喺后边好无聊咁转鼓棍，6号又因为剧情需要让咗个主音位畀侧田，自己被逼弹吉他，好惨！

Kay第一次做戏都做得几好喎，赞一个！梁祖堯继续夸张风格，feel到佢尽量收敛咖啦，但係都仲係夸！

除此以外，小肥演喜剧真係有一手！佢本身个人已经好好笑！记得几个月前佢上嘉姐嘅《音乐音乐我爱你》（即《叱咤乐坛》）宣传《Festival Traveler》嘅时候，佢自己不停喺度搞gag，几近失控！建议Paco可以好似捧郑中基咁捧小肥做喜剧巨星喎！

最近睇咗几出旧电影，有讲女人嘅《20 30 40》有古装片《冰河世纪》有科幻片《崖上的波儿》，有好有唔好，有辣有唔辣！

《20 30 40》

想睇呢出电影好耐，因为编剧之一係芝see菇bi（係啊！当时仲係响呢个朵！），无其他原因。好好彩地，最近数字电视嘅点播居然播呢部电影，于是就坐喺电视机前差唔多两个钟头睇晒佢！

阿芝係写“20”嘅故事，好疯狂啊，好係姖嘅风格！当年仲有份提名“柏林金熊奖最佳电影”添！劲秋啰咩事啊！

令人惊喜嘅係，杨淇係剧中演员之一，都係“20”嘅部分，令我对呢个部分更加有好感！姖都因为呢个角色提名过“金马奖最佳女配角”！呢位演员唔算靓，喺好多演出中都唔係主角，但係我第一次睇姖表演（《心想事成》）已经觉得姖好得，好中意姖！呢啲应该就係个人魅力吧！姖做戏好细腻，完全唔觉得姖喺度演戏，一举一动都係由心而发！十粒星推荐呢位优秀嘅演员！

睇完之后，有啲后悔之前无去捧场喺广州公演嘅舞台剧《华丽上班族之生活与生存》！同係有张艾嘉嘅导演同演出，有杨淇表演！竟然错过咗！

《冰河世纪1&2》

当大家都蜂拥去戏院睇《冰河世纪3》嘅时候，我至揾翻《冰河世纪》1同2睇！都係有原因嘅——睇到《冰3》嘅宣传，我至知原来一系列嘅《冰河世纪》中“大阿哥”呢个角色都係占占配音嘅！噢！睇粤语版至得啦！

占占配“大阿哥”好低音好沉声，好有型好性感，好高大好威猛！（尖叫中！）睇过啲采访报道，占占话自己本身好高音，要配低音嘅大阿哥有啲难度。不过02年高音啫，日日开咪做两三个钟头节目，到09年咩高音都无晒啦，已经可以本声演绎啦。

相比之下，我中意1多啲，因为梁汉文嘅声演好出色，而且最中意听树懒森仔叫长毛象个名——“辉辉”，2嘅时候已经无叫噜！仲有，2有阿Jan同阿Lo两兄弟配音，本身应该值得期待，但係睇落又觉得佢哋无戏，麻麻地噜！

有两个巧合嘅地方：06年达明配过两套卡通片，一套係《冰河世纪2》一套係《四条腿拯救队》，两套都係配一只乌龟，想点先？！另一个巧合就係，李灿森个样好似树懒森仔，囧！

睇完就发现呢出电影唔係单纯嘅搞笑卡通片，仲係讲环保嘅。温室效应发展落去就有冰河世纪咖啦，等住睇真人版啦！

《崖上的波儿》

我谂连宫崎骏都始料不及嘅係，波儿嘅主题曲竟然畀广大网民改成成龙大哥嘅“拍洗发水广告我是拒绝的……动L”，然后仲成为咗电台节目《早霸王》嘅其中一个环节！

波儿係一出好疯狂嘅卡通片！如果变成现实，真係好恐怖！一条人面鱼，然后变成一个人，有时又变成一个又对鸡脚嘅人！哇！几惊！

仲有，点解日本嘅小朋友係直呼其父母嘅名字呢？

睇下算啦，唔好深究！

第28届香港电影金像奖将于4月19号（今个星期日）晚8:30假尖沙咀香港文化中心举行。当晚嘅司仪除咗曾志伟之外，仲有谢安琪、何韵诗、毛舜筠、钱嘉乐及林子聪等共六位！哇！又有K，又有C！正！

为咗当晚更有投入感，我今个星期晚晚都喺度煲戏，尽量将所有我可以睇得落嘅主要入围电影都睇晒！睇完睇罢，又手痕要打啲字。

《我不卖身，我买子宫》：呢出电影我好早就睇咗，因为有森美，但係完全唔好笑！相比于同期嘅《绝代双娇》，我就觉得后者好睇好多，起码有一句：“阿妹，你係咪磕亲个脑袋啊？”事实证明咗我係一个多么肤浅嘅人啊！电影内容係围绕一个妓女，同《金鸡》有啲啲似，不过刘美君呢个妓女就惨情好多！但係姖同阿金一样自强啊！除此之外，仲有好多社会问题，太深奥，睇唔明都唔想去搞明佢。

《天水围的日与夜》：同係社会问题，《天水围的日与夜》都係反应另一个社会问题——天水围社区。呢部电影我比较有感觉。好佩服许鞍华导演嘅手法，全部电影由头到尾无高潮低谷、无跌宕起伏，全部嘢都看似轻描淡写，但都係其中嘅典型，正中要害！前段时间，香港新闻成日提到天水围係“悲情城市”，搞到呢个社区蒙上咗一层阴霾。但係呢部电影反应咗当中温情嘅一面，鲍起静同陈丽云两位老戏骨将两个角色演得好平淡、好自然。返工、放工、煮饭、炒餸、食饭、落街买报纸、……呢种“画公仔画出肠”嘅表达手法，原来都可以不但只烦闷仲畀人窝心嘅感觉！

《长江7号》：同係表达温情，《长江7号》两父子之间嘅温情都好感人。确实唔明白点解好似人人都弹星爷呢部电影唔好，在我睇嚟，我觉得好好！首先，特技肯定係非常好！7仔又跳又叫又表情多多，啲毛松下松下咁，几得人中意！其次，小演员徐娇嘅表现真係值得盛赞！咁细个就识对住空气做戏，仲七情上面，认真犀利。佢发现个绿色波波开始变成7仔嗰场戏，郁身郁势整古做怪，真係笑到我趴咗喺度！另一个好演技嘅係佢个死对头——“蛋挞头”有钱同学，佢啲演技仲劲仲浮夸！再次，就係电影嘅色调好明亮、颜色好鲜艳！我唔专业，唔知係咪应该咁讲，总之我睇呢部电影睇得好舒服，画面可以畀到我好愉悦嘅感觉。最后，星爷始终还是星爷啊！虽然佢戏份比起以前少咗好多，演技都内敛咗，但係都仲有嗰份神髓喺度呀！难道大家想佢几十岁人仲交啲流于表面（呢个词係我几个星期前睇报纸学嘅，当时嗰篇文章係用嚟形容郑中基嘅喜剧演技）嘅戏咩？！都係绿色波波变7仔嗰场，佢对住个仔讲：“係咪吸咗毒啊你啊？！”都几好笑呀！

电影开头星爷喺工地度食饭嗰一幕好靓好震撼！唔知佢係咪有心模仿Charles Ebbets喺上世纪30年代影嘅经典黑白相《Lunchtime atop a Skyscraper》？

《一个好爸爸》：同係讲父子情，《一个好爸爸》讲嘅父女情仲有趣！有趣嘅係黑帮大佬咁鬼cutie，为咗个女，特登将心口只老虎纹身改成得意仔图案；为咗个女，开片之前都要打个电话翻屋企唱首“打开蚊帐打开蚊帐，有只蚊有只蚊”；为咗个女，拜开关二哥嘅黑社会大佬要领洗入教；……估唔到张艾嘉咁有趣！

《证人》：同係黑社会片，《证人》就黑社会好多！因为有太多枪战、打交、追逐、斗殴场面，太血腥。于我嘅标准嚟讲，已经算係三级片，好难接受。

《画皮》：同係血腥，《画皮》嘅血腥比较含蓄，周迅食人心都用只袖遮住嚟食，好elegant！因为係《聊斋》嘅故事，我本以为好惊吓，好彩无想象中恐怖。但係来来去去你中意我，我唔中意你；我中意佢，佢又唔中意我；佢中意姖，姖又唔中意佢；……一大堆感情瓜葛纠缠！我谂最出嘅应该係甄子丹吧，平时戆直嘅功夫男可以突然咁……骑离！当然佢嘅功夫仲係好出彩嘅！

《叶问》：同係讲功夫，《叶问》由头到尾都係功夫！人物传记嘅功夫片都几精彩喎！尤其係太平时期嘅叶问，嗰种轻轻松松、凡事置之度外嘅态度，真係好有趣！到后面，为中国人争翻啖气嘅姿态，真係好有型！甄子丹係得嘅！

今个星期日，坐定定睇啦！

********我会爆剧情，未睇嘅朋友谂清楚至睇落去，不过剧情来来去去都係咁咖啦********

家有囍事2009主页

确实年年过年都不能幸免咁睇一次《家有囍事》！唔係92，就係97，再唔係就92、97一齐睇！

今年，“新年终于有笑片睇！！！”有我“最喜爱”嘅三姑、中基同埋谷导演喎，岂能错过呢！好开心，可以赶喺新十五之前睇到！

今次《家有囍事2009》都攞翻少少之前两集嘅桥段：兰子嘅金丝雀；古天乐嘅月经前紧张；百鸣哥帮夏春秋捏脚；三姑嘅“程大嫂”造型再现；同埋“你係边个啊？你车我去边啊？又係你啊，陈生？”，最正就係补多句“十几年无见啦喎！”；片尾合唱“齐欢唱，家有囍事”；……

三姑呢个造型真係好正！从旧年7月7号以呢个造型重新开咪之后，我就好中意！后生咗又靓咗！之前听《嘩嘩嘩》三姑就爆过阿Sa嗰场戏，我梗係mark实啦！“姑婆有其屋”同埋“家姐无得嫁，细佬无有怕”保险计划都好好笑，戏肉梗係睇阿Sa赞中基：“啊！你细佬都几好样咖喎！”（三姑爆原话係“你细佬都几靓仔咖喎！”）上星期一班演员上《嘩嘩嘩》，三姑以“阿Sa条仔”嚟称呼中基，笑到我趴喺度（用三姑嘅说话即係“笑到我七个一皮”）！

仲有贺岁片必备——揾啲大牌演员过下镜，老中青演员都嚟客串下（可能会数漏）：

老嘅：卢惠光、邵音音、高志森、冯宝宝

中嘅：达明、兰子、甄子丹、Mark Lui、《少林足球》嗰几位师兄弟、金牌御用茄喱啡（《甜丝丝》扮外星人嗰位）、乔宝宝

青嘅：李绮雯（真名叫“亚视过无线嘅o靓妹”）、HotCha、Yumiko、阿Sa、24味、Teresa、史提芬@Sun Boy's、白兔仔@Sun Boy's、Celina Jade

有少少遗憾嘅係，无周星驰。就算一个镜头都好呀，毕竟《家有囍事》係佢经典电影之一！可惜佢越嚟越难搞！

我仲留意到，古天乐同沈丽君（小敏）第一次去小敏嗰间露天café时，谷导演同另外两位工作人员坐咗喺度扮茶客甲乙丙！有两个镜头无对白无大头！我真係好中意谷德昭呢个肥仔！编剧导演监制演员主持，乜都得！

我好似听过，如果香港电影要喺大陆嘅戏院上画，戏中嘅主要角色必须有一定比例嘅大陆演员。今次百鸣哥为咗《家有囍事2009》可以登上大陆大银幕，特登请咗三位演员嚟担当主要角色。我睇完之后，又明白点解上香港啲讨论区，香港观众会有少少微词。有啲讲得好客气嘅：“如果讲大陆嘅成分少啲，就更加好喇”。我都觉得係！《家有囍事》喺大家心目中係港产贺岁片嘅icon嚟咖嘛！不过姚晨都几好笑呀，肯扮鬼扮马！《武林外传》嗰时，我都好中意睇姖！

成出戏都仲係好好笑嘅！有啲gag，真係忍唔住要喺呢度爆！中基嘅网名“间条猛料”，夏春秋係“风中散发”，琴姐係“动漫Maggie”；三姑话畀百鸣哥知，古天乐係姖男朋友，百鸣哥嗰句“牵强啲卦”；三姑介绍百鸣哥畀夏春秋识，话佢就係姖嗰个超级靓仔男朋友，夏春秋嗰句“真係各花入各眼”；……真係笑到标眼水！

谷导演话斋：“睇《家有囍事》唔使有负担嘅，过年嘅时候，大家一齐喺戏院度嘻嘻哈哈，笑一餐，笑到出晒汗！”

********我会爆剧情，未睇嘅朋友谂清楚至睇落去********

呢出係一出超级无聊爆笑喜剧！

成班o靓演员喺度斗屎戏！相比之下，Kary啲戏都几好喎！两个阿娇都扮得好好！ 除咗Kary同Stephy对调身份呢条主线，森美同Kary／Stephy嘅兄妹情都几温馨！呢个森美唔係森美，係盆Sir！仲有我喜爱的舞台剧演员——虾头。嗰场鬼上身戏最好笑！

出现喺剧入边最多嘅台词就係“顶你个肺”！用以表达演员嘅激动吧。田鸡话斋：“咁你都唔好下下都顶我个肺！”

我觉得呢出戏仲係一部广告特辑，全名叫做《金牌Neway旗下艺人代言产品广告特辑》。包括：香港宽频upload 100M都係几秒钟；Stephy去OK买嘢，用EPS找数兼攞钱；去Neway唱好K，一路食buffet一路唱K，生日仲有蛋糕送；以及随特辑附送澳门广告：咀香园咀香园买手信买手信；深圳广告：咪咪姨上深圳整牙。

仲有好多将观众拉回现实嘅桥：叫6号做娱乐记者，仲畀小明哥恐吓去做《怪谈》；关耀哥段rap last有一句：“你你你当我什么”；森美送畀阿娇嘅电子琴：“入边有齐晒‘金牌’嘅所有歌曲，古巨基同郑中基嗰啲全部齐晒，係吴雨霏嗰啲差几首。”；森美留翻只CD，话自己最新爱上咗写新诗，又念咗首《电灯胆》；然后啤住Stephy讲：“呢首歌相当之难唱，而且唱嗰个都好容易走音。”

一出好低能嘅电影！新年睇真係一流！

终于喺淘宝买到《戆星先生》VCD，终于有两个钟时间定得落嚟睇咗佢！

坦白讲，《戆星先生》係一出烂片嚟嘅！不过因为佢以云海同阿Moon做主角，我听咁耐云海，自然有兴趣睇睇呢出电影，睇睇云海同阿Moon嘅故事！或者应该讲，睇睇云海同阿Moon十年前嘅故事。呢只VCD係1997年咖！

我觉得Joe Ma净係用咗“云海”同“香港UFO会会长阿Moon”呢两个身份做主角啫，达明饰演云海，袁咏仪饰演阿Moon（原来阿Moon真名叫方仲满），其他嘢都係天马行空、乱七八糟嘅！

正如海滩叔之前所讲，揾佢客串就顺便度埋桥。我见到开头“编剧”一栏有海滩叔个名，即係海滩叔又有份客串！佢出场嗰场好好睇咖！海滩、Wyman、阿葛坐埋一台打麻将！Wyman係八两金条o靓，名叫“长毛”，真顶瘾！

跟住，其他，都无乜嘢可以写落去。算我烂尾啦，确实无咩咁好睇。

黄百鸣投资，谷德昭执导！等咁耐，谷导演终于开戏啦！

今次有三姑啦、中基啦，就呢两个已经可以笑到缺氧！加埋内地演员《武林外传》姚晨同《疯狂的石头》郭涛，仲有谷导演做导演，值得期待！

近几年无咗好似当年《家有喜事》、《花田喜事》之类嘅经典贺岁港产片，每逢过年，电视台净係可以播翻呢啲旧戏！明年好啰，有一部《家有喜事2009》冲喜，正！

听住《嘩嘩嘩》，跟住三姑八卦下出戏先！上个星期，听到阿Sa客串扮保险sales sell一份“家姐无得嫁，细佬无有怕”保险计划畀三姑，听个名就知几好笑啦！

我觉得三姑呢个发型，好好睇啊！

睇过《六楼后座》之后，知道黄真真拍《六楼后座2》，同埋有艾粒同農夫主演，一直好期待！

我向来都觉得黄真真绝对係有point嘅导演，每一部电影都好好睇，都可以带一个message畀观众。但係今次揾艾粒同農夫呢两对咁无point嘅组合，咁奇怪嘅！我本来都係抱住无point咁睇艾粒同農夫嘅谂法睇《六楼后座2》，

艾粒，向来被封为“臭口组合”（具体个案可参考《【揾】903最常听到的术语／暗语2-2》一文中，第61条），经常喺节目度提到棺材、死忌、丧礼等作为题目畅谈。“家属谢礼”就完全fit晒佢哋。

農夫，hiphop组合，成出戏不断有hiphop元素出现，不断rap，不断yo！

到后半部，Suzy患病开始有point到！

依家所谓咩8 0 后、9 0 后（其实我好讨厌咁样区分唔同年龄层次嘅人），大部分都好浮躁。试过有一个长期唔联络嘅朋友，有一次突然揾我，第二句就问我：“发咗达未？”“厚积薄发”视乎係时下年轻人喺鬼故至能够听到嘅一个词语。“点解要厚积啊？”“积几耐至发啊？”“我要即刻就发！”即刻发？可以啊！但係，有咩可以发啊？人哋默默耕耘，累积到一定程度，爆发出嚟好似火山咁有威力；啲0靓仔呢，咩料都无，可以发啲咩嘢，最多好似放个屁咁，就无晒！

成功绝对唔係偶然嘅！黄真真嘅电影好睇，都唔係偶然嘅！

继《独家试爱》、《十分·爱》之后，三部曲嚟到第三部《我的最爱》。

《我的最爱》入边，“我的最爱”有四位：虾头（杨诗敏）、王祖蓝、梁祖堯、森美。前三位都係香港演艺学院出嚟，我觉得演艺学院毕业嘅艺人最近几年表现得好优秀，除咗上面几位，仲有詹瑞文、张继聪、火火、……

虾头个角色名我已经好中意，叫“骑离琼”！加上姖又做呢种情绪喺一秒之间大起大落嘅角色，而且收放自如到咁嘅地步！犀利犀利！

王祖蓝个样咁cute，有先天优势之余，再使出浑身解数，真係笑得C人！

梁祖堯岩出场果几个镜头，我以为係火火嚟嘅。个场面好暗，而且两个都係呢啲麻甩佬，真係会搞错！后边再出场至睇得真。佢扮呢个烂仔角色真係入型入格，喺方力申屋企讲数果场，我觉得佢蛊惑嘅程度去到专业级数啰！

最后森美，不嬲都支持咖啦！佢同方力申对手果场真係浮夸得好紧要！6wing喺《六楼后座2》嘅making of讲过，佢自己觉得种自己已经演得好浮夸好浮夸好浮夸，但係经过镜头过滤之后，又无乜嘢。可想而知，当时森美喺现场，係笑C几多个剧组嘅兄弟！

正所谓一啖砂糖，就一啖……赞完就要弹少少嘢。

最后一场，导演可能为咗要承接翻上两次嘅结局，再次搞啲咁嘅嘢！我觉得有啲唔make sence啰。Stephy嘅老公阿俊（黄嘉乐）何德何能可以同完Stephy同曾愷玹再同翻Stephy又同唐宁一齐啊？！佢外表真係一旧饭咁样，剧情又无交代佢另外有啲咩特殊技能或者不为人知但係讨人欢心嘅一面！唔似吴京咁，外表西装骨骨英俊挺拔之余，仲交代咗佢识功夫可以接汤圆！呢类软弱、奶油角色，我推荐张敬轩或者佢个friend关智斌啰，起码个样靓啲呀！

另外，方力申死果场令我好不安！方力申血流披面个样真係好恐怖，我睇到有啲想呕！因为我只不过打算睇一出爱情剧，点知突然杀出个打打杀杀戏，全无心理准备！话翻转头，我又要再再再次赞赞方力申（今次已经唔係我第一次赞佢咖啦），佢啲戏真係好咗好多！尤其死呢场，死得好真，啲内心戏哔晒出嚟！另外，佢同曾愷玹嘅对手戏，发现佢啲普通话讲的好好！有刘德华水准！我睇好你！

我发觉我自己真係一个“烂片人”！所有得奖电影，除咗攞同电影关系最唔大嘅原创电影歌曲《我的最爱》之外，其它全部未睇过！我真係肤浅，我唔讲边个应该攞奖边个唔应该攞噜，我讲啲无聊嘢。

首先，三位主持，个个都係精英——三姑，估唔到今时今日，仲可以睇到三姑做大show！从《嘩嘩嘩!打到嚟》到《在晴朗的一天出发》到《她他她打到嚟!》，最爱听三姑讲啲无聊嘢，然后自己喺度笑到七个一皮！DoDo姐嘅作用最大，控制住三姑，旁住Sammi。Sammi成晚嗌住好惊。开头嗌好惊叫全场畀啲掌声，呢下好好！但係做到做完都仲喺度嗌，就过咗啲喇！其实姖真係做得唔错，除咗成晚嗌惊呢样做得唔好！

全晚读“甄子丹”个名嘅时候，我成日觉得佢哋会读“甄子——康”啰！无嘢！无聊嘢啫！

继续正题。话晒都係“香港”电影金像奖，之前成日都揾啲外国嘅嘉宾，个个出嚟就用啲无字母就唔知讲咩嘅广东话讲“大家好！我係×××！”或者好似前两年啲韩国嘉宾咁，自己有自己讲，全场唔知佢哋讲乜，讲完一轮，然后仲要刘伟恒翻译一轮！好彩今年budget唔够，请唔到外国嘉宾，仲好！

最精彩一part，就係志伟同阿泽果part。《嘩嘩嘩》之后，无再听过三姑同阿泽一齐做节目！倘若下年可以係三姑同阿泽做司仪，几咁好！讲番志伟果part，真係度得好好！泽：“老爷，讲开又讲呀，旧年你拍咁多戏，唔见你提名嘅？！”志伟：“阿泽，讲开又讲呀，香港旧年咁多人死，唔见你死？！”

讲番原创电影歌曲，中基首《星光伴我心》係05年嘅大碟《Before After》咖喎，啲歌词又会咁match到《老港正传》嘅！虽然攞唔到奖，其实出碟嘅时候，我已经好中意呢首歌！中基唱歌真係好好听！尤其係呢啲慢歌！可惜佢个样比较衰，一行出台开声，我就觉得佢要搞gag！好似许冠文咁，佢一出嚟，企定，讲：“琴日我经过医院……”嘻！都未入肉，我就笑定先！

之前每年都会见到三姑坐喺长毛隔离，今年一上一下仲好睇！三姑真係夸张！不过姖越夸张感觉就越好。到庆功宴，《东张西望》参访姖问司仪嘅酬劳係几多，三姑话：“得个零同个影！”哈哈哈！好中意！

我“烂片人”讲嘅：今届金像奖好好睇！希望明年可以见到杨淇喺提名名单度出现！希望明年可以见到三姑同阿泽合作做大show！