★☆薇薇薇薇薇☆★

仲以为无记要cut budget连“翡翠歌星贺台庆”都cut埋添，好彩无！自从05年重新有翻“翡翠歌星贺台庆”之后，年年都好精彩！

本来无打算，睇完之后都係忍唔住要写啲嘢。近几年，兴玩集体回忆，旧歌就首当其冲！

就喺第1 part，已经好感动！千嬅从两堂楼梯之间行出嚟，唱《再见二丁目》！一开口“原来过得很快乐，只我一人未发觉……”搞到我毛管戙！眼泪都几乎流出嚟啊！

最劲秋都係Band sound嗰part，真係“摇滚复活”！十几廿支电吉他band爆个台！搞到Joey Tang都唔够声！但係得两套鼓，泥鯭无得打鼓，要玩摇鼓（好中意泥鯭，忍唔住要揾佢）！无记都几悭水悭力，请翻阿Kay嚟《岁月无声》！

另外，跳舞嘅张继窿真係好charm！而且窿窿确实多才多艺，唱歌、跳舞、beatbox都有份！

两位幕后技术支持：

王梓轩，除咗係a cappella人才之外，喺其他方面都咁猛料，果然係神童！一个月之前上《叱咤叱叱咤》，教几位五音不全嘅节目主持（尤其奴奴）玩a cappella嘅时候，已经对佢加分，今次仲负责全台（定係净係a cappella呢part呢？）编曲同排舞，简直係艺术总监级数啦！恳请香港乐坛唔好埋没咗呢位神童！今晚嘅编曲，我最欣赏《未知》×《烈女》！真心编得好好！

INK，今次係第一次睇到INK玩beatbox！叹为观止！

其实今晚人脚都几齐，有古巨基、6号、小方、小肥、INK，係差咗侧田啫，点解唔唱翻首《年年有今日》嚟应下景呢？唔通排唔翻“金牌一条顺”就连歌都无得唱？！一直觉得beatbox加a cappella，呢首歌做得好精致，印象中睇过一次佢哋唱live，但係嗰次无INK，人脚齐嘅live都係叹为观止咖！

收到今晚晚报，老豆攞起嚟睇，睇咗一阵头版就读畀我听“孙耀威无奈退出乐坛”。吓得我即刻弹起，冲去老豆度抢份晚报嚟睇，整篇报道係咁嘅：

《声带出血 鼻生粉瘤 孙耀威无奈退出乐坛》

苦等六年，终在两年前有机会回归香港乐坛的孙耀威，一心要收复失地，却在近日因声带严重出血，被医生下令不能再唱。祸不单行，上星期他在照X光时又发现鼻生粉瘤，必须尽快做手术切除，否则可能导致鼻瘤异变。医生提议他放弃唱歌，否则有永久失声的危险。为了让声带休息，他本周六将坚持上星光熠熠辉保良慈善演出，此后便会宣布退出乐坛。

原本10月出唱片的孙耀威，上月忽然向所属的环球唱片公司以声带不适为由，要求无限期押后录音，并推掉一连串登台工作。据知半年前，孙耀威发现每次表演后喉咙便出现剧痛和红肿，起初他以为是一般歌手常有的声带发炎，于是便戒酒救声，但一直没有好转，最近才被医生证实是声带出血，每次唱歌都会引发声带微血管爆裂，喉咙充血。声带出血将孙耀威的事业计划全盘打乱，他原本计划明年在台湾出碟，如今都因病泡汤。

知情者透露，孙耀威和很多歌手一样，为了快速消炎开声，经常选择打类固醇，才有此恶果。孙耀威每月平均做20多场演出，是名副其实的工作狂，结果唱到声带劳损发炎，又长期服用类固醇，最终搞到声带出血。近日医生还检查出他鼻生粉瘤，要尽快做手术切除。医生称，因为孙耀威上半年撞车，导致鼻骨不正，压迫到肌肉，他又长期服食类固醇，致使免疫力降低，所以鼻黏膜容易感染细菌，最后形成粉瘤，要尽快做手术。

——2009年9月13日《羊城晚报》阿文

唉！好唔开心啊！香港乐坛又少咗一位有实力、有素质、有教养嘅歌手！

有实力係因为佢近两年有几首歌实在太劲：《Here I Go》嘅假音同埋《西太后》嘅京剧腔！劲到爆炸！上个世纪嘅代表作《爱的故事 上下集》一直都係卡拉OK热点歌之一。

有素质係因为佢係嗰一代歌手为数极少嘅大学生之一。睇过佢上《五年级插班生》节目，都係为数唔多嘅攞到5万蚊奖金嘅参赛者之一！佢嗰啲真係真才实学嚟嘅！

有教养係因为佢每次出嚟表演、接受访问都畀人好有礼貌，好谦谦君子嘅感觉！我觉得环球嘅歌手都係咁！成日都“多谢”前“多谢”后！

我唔係医生，唔知老孙病情嘅严重性，不过实在好衷心祝福佢早日康复，可以再战乐坛！

香港嘅传媒太叻啦！查查下刘华，无拉拉将千嬅同丁先生结婚嘅资料都查埋出嚟！

林建岳先生太爆啦！认刘华、千嬅结咗婚就算啦，仲要爆埋黎明！

９０３太配合啦！上个星期专业推介冠军歌就係千嬅嘅《真命天子》！唔知今个星期宣布咗婚讯之后，会唔会继续狂播，打破记录成为两周冠军呢？！讲下啫！

丁先生太有心啦！“如果有60岁的命，30岁过后就是人生开始倒数的时候。如果现在已经倒数就要更加珍惜，我可以陪你一起走下去吗？”

千嬅太搞笑啦！结婚都咁即兴，即兴到连结婚戒指都可以唔岩size！而且同丁先生嘅注册结婚相要企喺两条树杆之间呢？！

我好记得，中意千嬅係始于02年《新扎师妹》！一个超级正能量人！永远都畀大家好开心好正面嘅感觉！

就算回答传媒关于婚讯嘅问题时，千嬅都表现得好大方好得体好开心好好笑！

姖嘅婚讯都令一众fans戥姖开心！豆瓣都有“祝福千嬅新婚快樂”线上活动！

最搞笑嘅一个豆瓣签名係：“事实证明烈女也要结婚的！”哈！笑C我！

最真诚嘅一个祝福：“渴望爱的人，全部爱得很英勇”

我最中意嘅就係“一人一首 集合新婚歌單”！令我揾翻好多千嬅嘅旧歌嚟听。

最最最应景嘅当然係《真命天子》啦！除此之外《姊妹》嘅“总有天亲耳听到，我爱侣对天宣布：与死都爱惜我。终有天找到一个，真的值得我！”都係大热！夕爷！你係得嘅！

睇睇下发现咗网友讲啲嘢几有趣：

♥ 以前說《MR.》是MIRIAM和RONALD，誰知，現在仍然很適合，只不過RONALD變成REAL而已。Y果然有前瞻性！

♥ 我到现在还觉得《MR.》和《无赖》是绝配。歌词那个互补啊，虽然出街时间差了好几年。

祝福千嬅同丁生：♥ 花好月圆！两心相爱心相悦！有情人儿成双对！

一段名为《張敬軒...串過碼頭咕哩》嘅短片无拉拉又喺网上传紧。唔再贴出嚟，有需要嘅朋友请自行“百度一下”。

内容主要係张敬轩对住镜头係咁串“螳螂乐队”呢样唔得嗰样唔掂。而好多“不明真相嘅围观群众”睇完段片之后，都对片中张敬轩嘅言论为之乍舌！

实情係，呢段片拍摄于两三年前，係一个网站为咗宣传佢哋自己创作嘅虚拟漫画人物组成嘅乐团，特登请咗几位艺人嚟抨击呢队传说中嘅“螳螂乐队”，于是就有咗以上嘅“串咀片段”。（2009年7月3日《My Name Is 邦》张敬轩专访）

正如佢自己话斋：唔好嘅嘢一传就开，再点澄清都无补于事。

我唔係特别中意张敬轩，但係话晒都係“广州骄傲”呀，同埋起码佢表现出嚟係一个有规有矩有家教嘅艺人呀，咁样畀人屈，真係好冤啰！

野仔今年大碟《People Are People》出咗啦！

（注：野仔係由SANSKRIT醒神姜嘅小胡、坏碑唇嘅Chris以及I Love You Boyz嘅占组成之乐队。）

老老实实，我认识野仔都係因为少爷占啫。初识野仔係07年嘅《老地方》；真正认识，係旧年嘅《野仔纪念册》大碟同埋《野仔08毕业礼音乐会》，知道阿占喺音乐会最后唱到喊！个个都觉得呢条友平时无嚟正经，居然会唱到喊！佢哋啲歌词有好多情怀嘢，好係香港二三十岁人嘅“集体回忆”。

野仔啲歌主要係Christ或者小胡作曲，阿占填词。我觉得野仔三人都好似精神分裂咁，平时係一个角色，一旦翻到“野仔”呢个团体又係另一个角色！同係填词，阿占可以填艾粒《大饮茶》“高级的知客著高叉，推点心的阿婶无脚”极度无聊嘅词，又可以填野仔《忆年》“和校友讲再见离开，梦想千里远之外”呢啲感性嘢！Christ Ho，中文名叫何兆基，佢有个花名叫“蟹眼何兆基”，口头禅係“咩事～”（“事”字升高10个key），好笑咧！小胡，平日係朝九晚五打工族隐藏身份，当野仔要出碟出show时，佢就係一个hard-core band友。

《People Are People》大碟都係有啲精神分裂，有好嘈好rock嘅《藐藐》，有情歌《成田来未》，有情怀嘢《忆年》等等。我觉得佢哋每次出碟都当最后一只碟嚟出，畀心机将所有想做嘅嘢尽量摆晒入去，好有诚意！

值得一提，呢只大碟大部分歌名都係人名，好特别！其实啲歌唔係关嗰个人事，係食个名嘅意思啫。

《野仔》

“跟我哋一齐嚟玩呢首歌，即刻起身全场咪讲咁多”

野仔：佢哋自己队名。

几乎每队乐队组合都会有一首介绍自己，或者可以话係自娱嘅歌；另外，佢哋出碟啲歌，或多或少都係为当年音乐会准备嘅。呢首歌一举两得，一来介绍到自己，二来可以调动观众嘅情绪！好中意开头阿占hea唱嗰段！

《金至坚》

“仲有几千亿我仲有几千亿，我未够廿六老豆佢就想分身家畀我”

金至坚：金志坚，叱咤903《架势堂》、《Aishiteru》嘅节目助理。

最中意听阿占大嗌“仲有几千亿我仲有几千亿”！呢首歌讲一个有钱仔嘅奢华生活！写得好夸张，真係好嚣，好好笑！

《藐藐》

“你乜都藐乜都藐”

藐藐：MiuMiu，阿占只toy poodle（玩具贵妇狗）个名。呢种狗仔个样真係好得人中意！

好係“爆粗band友”好嘈好拆嗰啲rock歌，加上阿占嘅rap，讲依家啲人乜都藐得一餐！我谂起董太以前有句金句话啲香港人，后尾听三姑演绎翻：“Complain！Complain！你哋一日就係识complain！”

《阿文阿荣》

“你高歌我高涨”

阿文阿荣：阿文阿荣孖生兄弟，係佢哋啲friend；阿荣係朱薰嘅男朋友；阿文係乐队Mr.嘅结他手Dash。

首歌写一对孖仔从细到大嘅趣事，一齐喊，一齐笑，一齐长大，……chorus最后一句“你高歌我高涨”，我觉得真係写阿文同阿荣。阿文嘅Mr.成立，可以签唱片公司、成功出碟、喺叱咤台上攞奖、喺台上“高歌”，阿荣戥自己哥哥高兴、“高涨”啦咁！

《成田来未》

“某一天黄昏若有点时间，忘掉白天世事晚上东京跟你过海关”

成田来未：我估係“倖田来未×成田机场”吧！倖田来未係日本艺人，同“是日本人橡胶龟Ivan王友良”几friend嘅；成田机场，日本东京两个机场之一。

讲一个忙碌嘅香港人放低手上工作，同伴侣去日本relax！香港人工作咁大压力（喺广州嘅香港公司都咁痛苦，可想而知香港人自己会点！），去香港人最爱去嘅日本，仲要同最爱嘅人一齐，都几开心啊！

《周慕云》

“我另有一位可以见光，每夜套房内睡在右方，你慢了一步能陪我，看着黑发变灰灰那境况”

周慕云：提起“周慕云”，我净係知道903跨年大制作《黄金少年》入边，阿Jan饰演嘅角色；其实呢个“周慕云”应该係《花样年华》入边嘅梁朝伟！

呢首歌係小胡唱，好少听。Intro啲结他声，好係《妹妹的情书》feel，我开头听，不以为意，以为都係一首冧女情歌。殊不知，听多几次，睇埋歌词，原来係一首咁无奈，咁淡淡然，讲同第三者相爱嘅歌！哇！写得好高！

《蓝》

“向住理想冲去要尽力呀，要爸爸抱就回家”

蓝：係阿占未来女儿嘅名字。

阿占话要写一首歌《蓝》送畀自己未来个女，“蟹眼何兆基”即刻跳出嚟问佢：“你个女点解叫蓝（男）呢呵？”

细个嘅时候好曳，成日要爸爸照顾；逐渐长大独立，离开屋企，爸爸就唔舍得。阿占写得好窝心！真係写到爸爸爱惜自己囡囡嘅心思。

《忆年》

“笑笑步向前，霎时间就已十年，我始终不会改变”

忆年：林忆莲嘅“忆年”。

野仔最擅长嘅情怀嘢！人人都有自己嘅十年，个个听完都可以回忆翻自己嘅十年。“和校友讲再见离开”、“老友移居海外”、“每天工作障碍赛”呢啲嘢边个未试过？！大家，努力吧！

《People Are People》、《Night Night》

开头有《People Are People》，成首歌嘅歌词都係大碟名：“people are people”；结尾有《Night Night》，好似《瞬间看地球》嘅轻松音乐，将听众高涨嘅心情平伏翻落嚟。

因为我净係听咗只碟，未听广播剧《小小雪》，唔知啲歌仲有无其他意思呢！

4月11号野仔《2009 Easter Animals Live》嘅暖场乐队，Dear Jane×Donald＝Donal Jane堕落珍！个名好爆！Poster中Uncle Donald好有型呢！

Info

楊千嬅雖然蟬過別枝，2004年至2006年在舊東家金牌娛樂的日子讓她的事業創出高峰。現在金牌娛樂推出這張由《千嬅新唱金牌金曲》CD，由這位樂壇天后唱新演譯15首金牌歌手精選好歌，可算是她對舊東家最情深義重的一份禮物。

碟內千嬅翻唱的作品有：鄧麗欣的「青山散步」、古巨基「傷追人」、方力申「好心好報」、側田「命硬」、吳雨霏「愛是最大權利」、梁漢文「八里公路」、林憶蓮「為何他會離開你」、鄭中基 「閉目入神」及Cookies的「派對動物」等等。

List

01. 青山散步

02. 傷追人

03. 好心好報

04. 命硬

05. 情歌

06. 為何他會離開你

07. 閉目入神

08. 花灑

09. 羅曼蒂克

10. 掩眼法 (藍鞋子)

11. 八里公路

12. 501

13. 愛是最大權利

14. 找我

15. 派對動物

07年10月，千嬅过档Amusic大半年，第一次同Amusic合作开“All About Love”演唱会之时，金牌出咗只名为《千嬅新唱金牌金曲》嘅大碟。同06年2月Eason嗰两只碟可谓有异曲同工之妙。06年2月下旬，新艺宝同Eason出咗只EP《Life Continues》，就喺当月嘅上旬，Eason嘅旧唱片公司英皇整咗只《我的最好时代》出嚟，以混淆视听！我以为得英皇至做啲咁低庄嘅事，原来Paco都会，可能Paco都“听到钱嘅声音”吧。

呢只碟真係好诡异！点揾到千嬅入录音室录咁多首人哋嘅歌？定係全部都係Demo嚟呢？

最诡异嘅係，年半之后，我至听呢只碟！

封面好清新，好係华星年代嘅千嬅。

听落啲歌都似Demo多啲，编曲都比较粗糙沉闷，配乐又係低成本制作，和音都係千嬅自己和翻，hea到爆！好彩，千嬅都算係半个实力派，hea配乐都唱得咁好！但係好还好，好多歌都係原唱者嘅感觉好啲。估计应该係金牌收到歌，畀几个唔同嘅歌手试试，睇下边个出嚟嘅效果好啲吧。

好似《青山散步》，Stephy确实能够唱出少女甜美嘅味道，正如阿Jan话斋，千嬅已经从“少女的祈祷”变成“中女的祈祷”了，又真係好难好得过青春少艾嘅；而其他啲男仔歌，确实係古巨基、郑中基、梁汉文、侧田呢班实力派唱得有味道啲嘅。又一次忍唔住要赞赞Paco，又有巨基又有中基，储齐一套，真係巴闭！

碟入边最好效果嘅一首，我觉得係《好心好报》！唔係话方力申唔识唱歌啊，但係方力申真係唔识唱歌啰！千嬅同方力申嘅反差真係太大，一听就知。其实小方经常遇到好歌，好似最新大碟《Time Flies》嘅主打《月全蚀》，第一次喺电台听就觉得good，奈何小方低音唔够低高潮唔够爆，有啲浪费咗首歌！《月全蚀》开头一段，如果畀Juno用喉咙声唱，可能更加好！点都好，好歌有好报，上个星期劲歌金榜冠军歌《月全蚀》！

兜咗咁大个圈，其实我係想讲，上个星期小方上劲歌嗰件衫好正！嘻！礼服运动衫，係咪三叶草出咖？

好多谢安琪呐喊演唱会！Woo！

上个星期六《羊城晚报》嘅《谁在走红？》做咗一版谢安K嘅资料、报道、专访。与此同时，《请你做评判》嘅栏目邀请读者参与，点评当期红人。作为谢安K嘅fan屎，我梗係嗱嗱林发E猫过去，对我嘅挚爱“吹捧”一番啦！

好嘢！登咗出嚟！

其实我嘅原话係咁长嘅：“谢安琪从自资唱片公司开始，凡事都要亲力亲为，后来结婚生子，再成为天后，这一过程她没有过多的包装，很人性化地呈现了一位香港女歌手的奋斗历程于观众面前。而且她的为人和她的歌一样，都是走草根、平民风格。她演绎的歌大多朴实地反应一些社会上的问题，加上她优越的声音条件，成就了今时今日的谢安琪。她的成功证明了香港流行乐坛还是需要实力歌手的！”

佢哋删咗嘅部分，至係我觉得Kay得嘅原因。从第一首《姿色分子》、跟住嘅《愁人节》、到最新派台歌《祝英台》，都係讲紧社会问题，好有型咁唱出嚟！周博贤确实好擅长写呢类歌！

K好好声，但唱live好唔稳定！旧年至知原来姖有气胸。怪唔知得姖live有时会咁弱啦！

K好有型，但卸妆之后依然係一个有包包面嘅师奶。

K讲嘢好有道理，但时不时都会爆烂gag。

K，加油啦！我哋红馆见啦！

事隔个几星期，我终于重温翻晒《劲歌》。哇！堪称精彩绝伦、高潮迭起！

最精彩嘅，梗係“后浪推前浪”环节——请新人歌手同当红歌手对唱。其中精彩嘅表表者，我认为係黄宗泽同Eason合唱《K歌之王》，唱到黄宗泽标晒汗！我第一次见到人企定定唱歌可以咁大汗！正经啲，最劲嘅一part，个个都有眼睇，连占占都话：“王祖蓝KO咗古巨基呀嗰晚！”係啰，live表现咁好嘅歌手，竟然输咗畀一个live标汗嘅歌手，几奇怪！

记得第一次畀王祖蓝歌声吓亲，係07年嘅《Cash流行曲创作大赛》（即係是日本人橡胶龟Ivan王友良唱《红眼症》嗰届），佢唱咗一首《幻变乐园》。佢用少少opera腔口唱流行曲，真係叹为观止！当时估唔到佢咁唱得！到唱《爱与诚》都仲係呢种opera底唱，好够气，好压台！王祖蓝确实係曾志伟接班人，个台咁大，个人咁细，体积有限，个人魅力可以无限大啊！

演艺学院，好嘢！

依家希望TVB手下留情，唔好喺呢一两年内将王祖蓝用到尽玩到残啦！

王祖蓝至係实至名归嘅“最有前途新人奖”得主啊！鼓掌！

PS

当晚嘅“最受欢迎女歌手”千嬅讲紧得奖感受时，突然起《明日再会》嘅音乐衬底，好衬好啱使，fit到好似做后期制作嘅配乐咁fit；

但係到“最受欢迎男歌手”古巨基哽咽住讲感受，起首《年年有今日》人肉beat box嘅MMO，然后巨基又喊住唱到震晒走晒音，真係好爆笑！

因为要睇阿王演唱会嘅关系，我miss咗劲歌总选。一向被我觉得沉闷嘅劲歌结果，今年居然咁surprise！

我好中意阿占最新日志嘅一句金句：“一係有態度, 一係做大路。”哇！几有型啊！你哋903有态度，佢哋TVB咪做大路啰！

有点样嘅节目主持就有点样嘅听众。我日日听903，以为受晒佢哋嗰套，殊不知，今次劲歌嘅结果令我觉得，原来我爱的是劲歌的！鬼咩，细So话斋，我听嗰啲节目“好少播歌，净係笑”嘅！

无睇颁奖过程，直奔结果，所以唔知咩颁错奖攞错奖讲错嘢之类嘅细节。只能够讲句：意外度度有，劲歌特别多！

我记得旧年我写十大劲歌嘅嗰篇日志，last处我写咗“十万个问劲歌”，其实今年又何尝唔係呢！好多奖项嘅设置、得奖者都好无厘头，究竟评选准则係点嘅呢？颁奖嘅时候介唔介意简单咁介绍一下呢？

不过，好彩劲歌设置嘅奖项数量适中，唔太多又唔太少，可以畀尽可能多真係好嘅歌同歌手都上台威下！我最中意劲歌呢几个奖：

十大：《歌·颂》、《韵律泳》、《眼睛不能没眼泪》

杰出表现银奖：麦浚龙

最受欢迎唱作歌星金奖：王菀之　银奖：侧田

最受欢迎合唱歌曲金奖：周柏豪、郑融《一事无成》

最佳歌曲监制：歌曲：写得太多　监制：金培达　主唱：麦浚龙

都係嗰句啦，《与蝶同眠》唱得好，但係唱快歌喺依家嘅乐坛嚟讲，无几多个有姖咁劲！

Hit到咁，无嘢讲啦！《钟无艳》好啲！嗯！

呢首真心正！好啱呢个时代嘅杨千嬅唱！

歌手嘅歌确实贵精不贵多！唱啱一首fit自己嘅歌，好过唱一百首hea歌！Jade，go on rock and roll！

嗱嗱嗱！劲歌识货喇！我觉得呢首係Eason喺08年度最好嘅一首歌！旋律上係《Crying in the Party》延续篇啰。

首歌好闷。多谢TVB！

嗱嗱嗱！劲歌识货啊，too！好歌嚟咖！《青山黛玛》中劲，可惜无时间畀佢冲！

好听，不过唔够《樱花树下》好，但胜在有意义！

嗱嗱嗱！劲歌识货哈，three！

“他，实太好！”

广告歌最紧要琅琅上口，即係好K！“Twinkle twinkle lucky star，tell me baby what you are”、“I miss you，感动你，这份爱太神奇”、“You are my best friend”呢几句上我脑了，抵你哋攞广告歌！

呢个“华语歌曲奖”又係无厘头嘅，计我话，08年度嘅“最受欢迎华语歌曲”点几都应该係《我和你》或者係《北京欢迎你》啰！呢两首歌连铜奖都攞唔到，上边呢三首都受之有愧啦！

一係你哋就唔好开得个名咁大，改成“最受TVB欢迎华语歌曲奖”算喇！

《渴求》点解又会“受欢迎”过《只要和你在一起》呢？刘美君嘅《浮花》都好受欢迎咖喎，何解又无奖呢？老孙有奖，都係开心嘅！

農夫嘅《冧冧Everyone》，原本係万宁广告歌，后尾至改编成依家咁。如果有奖，算係广告歌定改编歌？我得呢首歌喎！

呢part合唱歌颁得好啊！金奖同银奖，一首K歌手s唱嘅K歌，一首实力派歌手s唱嘅实力歌！劲歌识得欣赏《一事无成》，好开心呢！

《写得太多》绝对係好歌嚟咖喎，我甚至觉得係金曲金嘅地位添，奇怪佢点解无畀各大传媒重视！

“最佳编曲”其实可以考虑下《樱花树下》呀，中后一段无编词畀敬轩唱，等佢可以回回气，不至于唱到哮喘翻发。编得好巧妙呢！

好开心，Juno有奖啦！Juno 08年真係好杰出啰！两张大碟、一张EP，而且都有好好嘅口碑！佢喺《Black》接受Donald访问时都讲，佢今年做到一个多产但係保证到歌曲质量嘅歌手！“有彈藥的確可以爭取更多機會，但有機會時還真的需要你落手落腳做。”你做到啦，恭喜晒！

仲有，菊姐有几杰出呢？其他落选嘅歌手有几唔杰出呢？堪称不知所谓！（睇睇Donald blog，赞！）

好嘢！“每首上榜歌都係你自己写嘅！”Ivana有奖之余，侧田都有！《Infinity Journey》同《阿田》，好嘢！

两位歌手要多谢TVB。杏儿可以唔多谢，因为确实有啲实力！

我仲以为Fiona Fung可以攞个叱咤奖添，点知年尾突然杀出个方珈悠！论实力，Fiona唔算实至名归，攞银奖就实至名归喇！

正所谓：“玲玲出嚟又睇掌啦，農夫今年又攞奖啦！”连TVB咁大路都颁个奖比indie出身嘅rapper，世界变啦！“啲听众觉得我哋啲rap係歌！”“多谢你支持，真係唔easy！”

咁点解At 17连影都无嘅？再次戥EO2唔抵！

醒个亚太区畀佢哋，无拉拉升咗佢哋上神台，下一年点搞先？

08年度最诡异大奖：最受欢迎女歌星杨千嬅！我爱千嬅！姖今年唔係话咩都无做，但係同前几年相比，都唔係尤其好啫！前几年无，今年反而有……喺劲歌拜神仪式时，讲到明话：攞多次先甘心去嫁人咖！当然明白姖当时只係搞气氛啦，点知转过头第二日真係即刻有个奖！呢件事好诡异！建议云海可以去查下！

巨基都係！《爱得太迟》、《好回家》嗰排因为歌太好，啲奖去晒歌曲度，歌手奖通常无！香港乐坛颁奖典礼怪现象！

好啦！我嘅新年愿望係，以后睇翻多啲《劲歌金曲》啦！多谢TVB！