★☆薇薇薇薇薇☆★

10月20号，my903 forum有个post，Heison开嘅，名为《艾粒發人深省的道理(矮仔VS高佬)》，入到去，係一段Youtube片，例牌睇唔到。今日喺土豆，有好心人转咗上去。睇咗，笑到我肚痛！

 

艾粒学翻当日森美同豆豆喺电梯口相遇，森美教训豆豆嘅经过（J2台《打出十人巷》CH8最后十分钟）！奴奴学豆豆学得劲似，尤其係“我可唔可以唔同你讲嘢啊”！呢句係重点！占占猛戳森美咀，又乘机醒咗奴奴一巴！后边一班，梁文礼啊、急急子啊之类，扮晒龟仙人、o靓模佢哋咁，一路听一路点头，之后仲围住奴奴，交足戏！

到最后，原来顺便宣传埋年底嘅艾粒show！

当然啦，正版森美嗰段嘅内容发人深省好多！尤其係嗰句：“你可以係一个唔好嘅artist，但係你唔可以係一个唔好嘅年青人！”大哥，好嘢！

今届《美在花城》一直令我期待——星航哥同森美大哥首次合作！之前都讲过我几中意呢两位电台节目主持人，竟然可以睇到佢哋两位合作，真係觉得好神奇！

以往森美做大show，都係搭志伟哥等之类嘅前辈，佢会表现得好谦卑同埋要做下靶，但係佢骨子里从来都係做上靶咖嘛！星航哥喺主持范畴嘅代表作，当数《心水保姆》，睇到佢同保姆们嘅对答，我又觉得有啲大材小用，奈何广州台无乜大show畀星航哥做，浪费晒！今次佢哋两位嘅合作，真心好睇！两位主持嘅水平相当，普通话嘅水平都相当（森美经过H1N1停课嗰排跟小学鸡学普通话之后，真係有进步，赞！），你来我往，十分精彩！

最拍烂手掌嘅都係星航哥同森美大哥单打独斗环节——泳装问答环节！有两个位我觉得好好笑！第一个，係星航哥话3号一对孖女行出嚟好整齐好好睇，森美话姖哋“跌低都一齐跌低”。星航哥即刻窒佢：“讲啲好嘢好唔好？！”第二个，係有一条问题问选手：如果姖同一位女明星通常撞衫，女明星诬蔑姖件衫係流嘢，姖会点应答。森美同星航哥即场演咗场戏，森美扮女明星，星航哥扮助手，两位都交足戏！唔知係咪呢排排得多《家樽抽》，森美一嚟就樽老太上身，劲！

留意到大哥唔使念稿嗰时，劲戳样，同埋戳森美咀！

当然，两位嘅默契仲係差啲，希望以后再有机会合作！

继续，表演嘉宾。怀疑广州台为悭水悭力，一次过全部嘉宾都请“金牌人”——小方、Edmond、侧田、森美！

重点係小方……件衫！我好中意小方件疑似三叶礼服运动衫！中意到佢喺今年3月28号播嘅《劲歌金曲》，佢首《月全蚀》攞冠军歌唱live嘅时候，佢著过一次，我仲写埋喺日志度添！佢今晚又著多次，势估唔到会有件蛋散认得！

三位都係唱啲劲hit嘅K歌，仲重新编曲添。好想知係阿Mark编定係广州嘅音乐人编，编得OK good！亦都估唔到，佢哋会拣Edmond嘅《披头四》！最近劲中意！

其他，无咩特别喇，有啲沉闷！

因为占占放假嘅关系，过去嘅一个星期都无《攣猪猪》，于是我就揾翻首《路易威 is yet to come》嚟听以解相思之苦。

听听下，干脆将艾粒《我想买只 I Love You Boyz 大碟》、《Silly King》、《艾粒电视台》、《艾粒巨棒堂》、《艾粒1979口牽口30年》几只碟嘅所有歌都听一次，发现有惊喜喎！

1、早喺04年英皇年代，《苏虾要食奶》已经有王凤女士嘅出现！之后嘅《爆裂战队》王凤女士都得到一句歌词：“等埋我攣战士啊！”

2、《Good Morning Class》入边有一句歌词：Kawaii Siu Yee Mini！

3、《差人，咪郁》除咗feature咗Boyz，仲feature哨牙婆！

4、《娜娜奈奈》更加啱做《攣猪猪》主题曲，最正阿占唱嗰句：“CAM CAM地仲自在，齐齐到泰国去训练”。

5、《Silly King》，加盟Silly Thing之后第一只EP，其中嘅《大饮茶》、《舞台皇者》、《艾粒情歌》同埋《路易威 is yet to come》都係Eric Kwok作曲，唔怪得咁好听！余下嘅《犀利酲有限公司》都係Jerald作曲！都劲！Donald喺首歌度不断add lip：“Silly Thing for life！”

艾粒呢期最有型！

 

6、经常hea填歌词，成日用叠字或者重复歌词挜字数，差唔多每首歌都hea填！例子包括：

《唔好吹鸡只嘅尾部》：中间有一段Donald乱咁发啲类似泰文嘅音当歌词，好似依家玩“DJ先生·你至歌”咁。

《娜娜奈奈》：“啦啦啦啦啦啦啦啦啦啦我唱得好听”

《龙兄凤弟》：“成日闹人VEN仔大佬搏命嘈粗口DODODODODODO”；

几乎每首歌都係hea填歌词，不能尽录。但不能不提嘅係最淋漓尽致嘅《我我我我我有胸部》，连歌名都喺度挜字数！好係佢哋依家做530剧场嘅风格——hea！

 

我最喜爱的艾粒歌係《个头痕唔痕呀》同埋《大饮茶》，你哋呢？

 

呢段片喺my903 forum传颂已久，终于有机会睇到，怀疑警讯嘅编剧同埋呢两位演员都有听《攣猪猪》！

受害者JimJim（好衰唔衰仲要真係叫JimJim）好似朱艳强，尤其係嗰句：“哼！嚟到深圳都唔嚟揾我，嬲嬲啊！”哇！真係攣到爆！

呃佢嗰个MingMing好似罗友大啰！笑到我呢！

我又一次过听晒《最好的时光Season3》，又一次淡淡然嘅感觉！

呢个广播剧倒序嘅方式，早喺大半年前嘅Season1就播咗第65集大结局，两次听嘅感觉极之唔同！

第一次听结局嘅时候，觉得佢哋有啲大兜乱——点解何淑馨（E）有幸福家庭，而余傲芝（Wing）反而仲係单身呢；依家听，又觉得——现实中原来都……

《最好的时光》完咗，wwwinggg都要离开903，记得wwwinggg最后一次喺《叱咤叱叱咤》开咪嗰日，占占赠咗姖一句：“错咗一次唔可以再错咖啦！”原来呢句说话放喺余傲芝身上都啱用。

第一次听结局嘅时候，觉得佢哋可以揾到苏玉华同吴君如声演两位主角好够噱头！但係一路听落嚟，再听多一次大结局，听唔到E同Wing两把声，觉得好唔舍得！而且何淑馨个女结婚，点解无黄仲旗咖呢？！

我有谂过希文係占占用王凤声扮嘅细路，实在太好笑！不过占占扮嘅Benny都够好笑！虽然都係cam cam地，但係同朱艳强完全唔同两把声，劲啰！

Season3最妙嘅就係揾《如果我是陈奕迅》嘅Allen@Mr.扮陈奕迅！我开始以为真係Eason，因为嗰啲喉咙声同嘻一声偷笑嘅细节都好似，点知係Allen！

season3我最中意何淑馨同余傲德嘅wallpaper！因为我本身对阿Pakho劲有好感，识得唱作又係第一代“男o靓模”；而Ekee又够黑面！同埋佢哋都戳到William So所讲嘅“眼肌”！劲有型！

 

《最好的时光》播咗三个season，《劲金歌曲》都rerun咗几次！好多流行曲贯穿成个广播剧，贯穿咗大家嘅成长过程，“我们都是听流行曲长大的”！好多我都听过，不过我都係对Season3中后部啲歌熟啲！而且Season3余傲芝一句独白讲中咗我嘅心事！

多谢晒妹妹妹妹制作咗一部咁淡淡然嘅广播剧畀大家！何淑馨、余傲芝，从来是一对！

 

重温&制作特辑

《忽周》 20090717

 

I Love You Boyz（人稱「艾粒」）自出道以來，一直被稱為「騎呢組合」。

何謂騎呢？性格古怪、相貌奇異、衣着突兀、言行出位的，一律可稱為「騎呢」。

艾粒，的確符合以上條件。左邊的 Donald，別名阿奴、奴撈，五短身形，樣貌介乎正常人和宅男之間，他不笑的樣子，已經好好笑。右邊的阿占，別名少爺占，長期染金毛，永遠扮潮童，煞有介事地含恨怒啤，更加好笑。

二人做 DJ，是最受歡迎的年輕人節目；二人主持電視台的整蠱 show，更是添食再添食。與其說他們騎呢，聽眾/觀眾豈不更騎呢？

「我們笑嘅，都係大家有共鳴嘅話題。騎呢只不過係包裝，搵食啫！」他們一本正經地說。

扮過女人、基佬、動物，就是從沒乖巧地做回本份。今年書展，個個出書，他們出 DVD，還夠膽跟一眾歌星和o靚模同日搞簽名會。

「你點知我哋啲fans唔會多過佢哋？」

也是，鷸蚌相爭，漁人得利。斯文乖仔老早不合時宜，很認真地做看似騎呢的事，才叫型。

 

我們本身騎呢

訪問之前，受他們節目影響，總覺得「艾粒」二人古靈精怪無句真。接觸過後，發覺二人不但不騎呢，而且思路清晰，對答有紋有路。

到底是合作多年老拍檔，少爺占跟 Donald很有默契。通常阿占先發言，Donald補充拍檔不足。二人從不搶白對方說話。

忽=忽周　占=少爺占　 D=Donald

忽：I Love You Boyz，是否做乜都得？

占、 D：唔好咁講！

占：我們只不過是普通香港人，沒有甚麼專長，因此甚麼都試下做。

忽：玩騎呢要一次比一次突破，這樣下去，有沒有底線？

占：除了全裸，基本上沒有問題。如果真的要set一條底線，是搞笑時不能傷害別人；傷害自己則完全無所謂，因為我們的尊嚴早已徹底被摧毀，已沒有自尊可言。

D：我們不是在「扮騎呢」，我們本身也是騎呢的人。這樣說好像很悲哀，但觀眾願意付錢去買騎呢，這也是成功的一種。

占：是的，我們不是陳冠希、吳彥祖，他們 sell靚仔，我們只能sell騎呢。做電台節目時，我們先要「撻着」自己，才會好聽。

忽：但着到古靈精怪在街頭讓人指指點點，不尷尬嗎？

占：這條路是自己揀的，不但不尷尬，還很喜歡在街頭錄影。以前在錄音室，我講他笑，他講我笑，不會知道聽眾的真正反應。

D：可能我們真是變態，愈令人發笑，愈有成功感。我們不是詹瑞文，人家是學院派，我們只是聲音派，當做電視節目時，自然要靠古靈精怪的服裝去引人注意，自己也容易入戲。

占：係呀，有次阿奴（Donald）戴着假髮，着道士袍，他真的以為自己是個天師……

忽：這樣說來，是沒有包袱了？更加沒有甚麼 message了吧？

 

 

 

嘩，好驚呀！

占：兩者都沒有。這個世界已有詹瑞文、黃子華、林海峰，已經有太多訊息了。觀眾看我們，不過想開開心心，毋須想太多。

D：我們也不是未試過正經，由英皇轉簽Silly Thing時，找過Eric Kwok（郭偉亮）作幾首正經歌，出來之後俾人狂噓：「扮乜歌手啫，走啦」。自此知道，簡簡單單做個騎呢位反而最好。

忽：自從《阿笨與阿占》和《愚樂 I Love You》之後，成功入屋了吧？

占：本來都不清楚自己「入」了「屋」沒有，但出到街，自自然然 feel到。

D：最大分別，是出街食飯，無訂枱都會自動有位。但也有弊處，就是不會有人把我們當認真。試過有次找交通警幫忙，他第一句便說：「係咪整蠱我先？」

忽：最初入電視台，有無「瀨嘢」？

占：有，在電台我們慣了也文也武，去到電視台，才發覺大家的語言不同。

D：我們出道那年，有次輝仔（林映輝）來做訪問，問我們作為樂壇新人有甚麼目標，我們以一貫玩嘢作風答：「想打敗劉德華囉！」豈料輝仔當堂 dead air，她不知道怎樣反應。那一刻，大家都很尷尬。

占：好在我們一向嘻嘻哈哈，遇上這些尷尬位，也可以嘻嘻哈哈帶過，大家不會知道我們其實好緊張。

 

忽： DJ出身，做過歌手，又做過電視，最大體會是甚麼？

占：做 DJ時圈子好細，視野比較狹窄，經常取笑歌手咪嘴、扮嘢。做了歌手後，原來自己都會犯同樣毛病。例如不舒服，真的需要咪嘴；做訪問，真的會有化妝師髮形師經理人助手保母等一班人跟住你……入了電視台之後，更加知道天外有天，人外有人，他們個個都自力更生，工作時間又長，根本無人照顧你。

D：這行真是一種長時間戰鬥，我們做了幾年 DJ，才知唱片業運作；同樣地要花更多時間在電視台，人家才會俾面你。

忽：這些年來，有沒有嗌交？

占：好少，一來男仔，比較少是非；二來我們都係為錢啫，不如快快脆脆做好件事，嗌乜鬼交啫？

D：對，我們槍口對外，目標一致。

忽：為何我們經常覺得Donald俾阿占恰？

占：這是我們刻意營造出來的，一隊組合有上下把位才好玩，就像森美小儀。我都可以扮蠢那個，但不會好笑。阿奴其實一點也不蠢，他很懂得利用自己的儍/鈍/矮去引人發笑，不知幾醒。

Donald默認，沒有回答。

 

 

艾粒初出道時，常以巨型假髮示人，原來有玄機：「可以『掗』多啲報紙版位嘛！」《蘋果日報》圖片

 

 

今年一月轉投金牌大風，書展出 DVD。公司近日的風雨，似乎對二人沒有影響。

 

 

少爺占

原名：甄子康（ Jim）

年齡： 32

學歷：理工大學設計系

家庭狀況：父母

感情狀況：中五開始與同學 Tina拍拖，至今十五年

入行經過： 97年參加商台 DJ招募， 98年正式開咪

 

我不少爺

 

甄爸爸後生時，跟阿占原來好似樣。

 

「少爺占」只是多年前一個廣播劇的角色而已，真實的甄子康，並不少爺。他甚至有點文質彬彬，極易相處。

「爸爸在藥廠裏工作，媽媽是護士。他們兩個都沒有脾氣，經常教我，發脾氣是解決不了問題。」

這是一個西灣河區的小康之家。他中學畢業後考到理大，同時又考到 DJ，結果選擇後者。

「九八年是廣播界的黃金年代，他們那班才是真正的少爺。最新款的名車，一定可以在商台停車場見到。他們由廣播道去九龍塘畔溪吃飯，行條樓梯下去便可以，但都要伸手截的士。嗰班友唔識行路㗎，好奢華！」

後生仔，眼界大開，立志要做名 DJ。他轉數快，○二年創作了長達五年的《I Love You Boyz》廣播劇，諷刺偶像派歌手，大受歡迎。英皇其後成立男子組合 Boy'z（後期變 Sun Boy'z），名字也是抄他們。

「我好好彩，入商台不久後新城挖角，很多 DJ走了，我開始受重用。那時做事特別勤力，心想：『今次仲輪唔到自己？』到了○三年 SARS，又有《 I Love You Boyz》帶給大家歡樂，我基本上沒有甚麼挫折。」

 

已經想退休

 

與女友中五拍拖至今，點維繫？「無嘅，我向來鍾意舊嘢。」《 Face》圖片

 

順風順水，公餘時間還夾 band。他組過「3P」，現時又有「野仔」，經常有演出。

「我少做運動，又沒有甚麼嗜好，因此鍾意『攪屎棍』。」

年紀輕輕，已是商台音樂節目總監。「聽下啲歌有無粗口啫，無乜特別。」

他精明，而且範疇多，電台與電視以外，配音工作多不勝數。傳聞月入至少六位數字，因此還打本給女友開精品店。

「報稅時可以說盤生意『蝕晒』，費事益稅局。但講到尾，還是最喜歡買樓。我有條方程式：周星馳買樓時，一定要跟住他買；但若然李嘉誠賣樓呢，你千萬別買，哈！哈！」

他的夢想，是三十五歲退休。

 

 

Donald

原名：唐劍康（ Donald）

年齡： 35

學歷：觀塘瑪利諾書院中五畢業

家庭狀況：父親，韓裔母親已失散將近三十年

感情狀況：與前女子組合 Krusty成員 Jan拍拖四年

入行經過：93年加入商台做辦公室助理，98年與少爺占合作至今

 

 

小時候的 Donald，幾可愛，可惜沒有母親愛錫。

 

同樣叫阿康，唐劍康的故事，就沒有甄子康般幸福。唐爸爸早年經營韓國餐廳，認識了當侍應的唐媽媽。兩人在 Donald三歲時離異，他之後每周見媽媽一次，直至七歲。

「爸爸跟媽媽又嗌了場大交，自此就不讓我再見她。二十多年了，她身在何方，是生、是死都不知道。印象中，她很美麗、很瘦削，像韓馬利。」

已經不痛不癢了， Donald也懶得裝多愁善感。

「因為沒有真正擁有過，所以沒有感覺。就算母親節，也不會想起媽媽，她已從我腦海裏消失了。反而爸爸對我很重要，他很嚴，我曳，他就一巴掌升過來。」

他在紅磡區長大，自小一個人返學放學，沒有學壞已算偷笑。

「只恨我經常吃飯盒和公仔麵，一直長不高。」

 

做到 DJ，仲想點呀？

 

女友在場，立即升高變「英俊版」 IQ博士。

 

九三年中五畢業，本報讀了大一設計學院，後來課程因為收生不足而取消，他就入了商台做 boy。

「三千七蚊一個月，斟茶遞水，收信派信，即係做阿四，一年後升做文員，有六千幾。」

不久再升做錄音室控制員，幫手接電話。

「幫軟硬、 Wyman（黃偉文）喎！已經覺得好光榮。出面當他們是明星，他們當我是朋友，仲想點？」

他很踏實，也很謙卑。後來跟蘭茜做節目，兩個人好哋哋，蘭茜跳槽，他一支公開咪，原來應付不來，被「燉冬菇」往製作部。

「自己唔掂，不能怪人。在製作部那四年，兼職做星期日朝早六點鐘節目，倒屎咁早，無人聽，因此無壓力，反而重新開始學做 DJ。」

在商台浮沉多年，沒有懷才不遇，因為自覺無才可言。遇上少爺占，一凹一凸，事業才有起色。

「阿占係叻過我，無得妒忌。等如 Madonna唔會妒忌 Michael Jackson識 moonwalk。我有自知之明，知道自己定位。做人信念是，這個世界需要你時自然會用得着你，無得『out撈』。」

他自覺有今天成績，已經「執到」。

「我入商台本來只係做 boy，現在做到 DJ，已經覺得好幸福。將來，做到個資深傳媒人就夠了。」

他樂天知命，但同時也很悲觀，幸好女友一直從旁鼓勵。

「她認識我時，已知我走這條路。結婚？一定會，但要等隻『大笨象』（滙豐控股）升番上一百三十蚊先有得搞！俾隻『大笨象』踩咗兩腳，好傷呀！」

 

 

後記

「係呢，你哋會唔會喺電台講話接受咗《忽周》訪問？」我問，皆因他們很多時在節目內自爆接受了那本雜誌訪問，半搞笑半宣傳。

阿占答：「唔啦，費事同你啲內容撞啦。」

還是 Donald老實：「通常我哋咁講，係因為嗰日諗唔到話題。」

7月 17日（出書當日）下午，真期待聽聽他們會說甚麼。

 

撰文：林蕾

攝影：謝孝祥

髮型： Johnny@Motif

化妝： Chris Wong@Mae Von Make Up

 

***********唔好望住我，我係分隔线***********

 

薇：我好认同占占嗰句：“這個世界已有詹瑞文、黃子華、林海峰，已經有太多訊息了。觀眾看我們，不過想開開心心，毋須想太多。”呢个都係我中意佢哋节目嘅原因！

唔好觉得艾粒做嘢无厘头，其实喺电台电视电影界捞咗咁耐，佢哋知道观众受咩就做咩，佢哋至係真正嘅“大智若愚”！

PS.奴奴细个真係好得意好靓仔，但係依家搞成咁 -_-b

Mon～Fri
06:00 - 07:00	有誰共鳴	何利利|嘉賓主持
07:00 - 10:00	在晴朗的一天出發	林海峰|鄒凱光|朱薰
10:00 - 12:00	早霸王	森美|小儀
12:00 - 14:00	雲妮鍾情	Vani
14:00 - 15:00	叱咤樂壇	梁文禮|謝茜嘉|EKEE
15:00 – 18:00	叱咤叱叱咤	占|Donald|EKEE|WWWINGGG|青木急急子|麻利亞|豪子
18:00 - 20:00	好回家	細So
20:00 - 22:00	叱咤樂壇	梁文禮|謝茜嘉|EKEE
22:00 - 00:00	嘩！嘩！嘩！打到嚟！	吳君如 | 王貽興 | 阮子健
00:00 - 02:00	一八七二遊花園	余迪偉 | Bu
02:00 - 03:00	你睇我唔到	陳強
03:00 - 06:00	一切從音樂開始	余宜發
Sat
06:00 - 09:00	日出而息	WWWINGGG
09:00 - 11:00	西加航空	謝茜嘉
11:00 - 13:00	903 專業推介	細So
13:00 - 14:00	903 豁達推介	細So
14:00 - 15:00	903 id club id 人辦	占 | 梁文禮 | 毛毛
15:00 - 17:00	AiShiTeRu	小儀 | 余迪偉
17:00 - 19:00	Black	Donald
19:00 - 21:00	你聽我唔到	陳強
21:00 - 23:00	伊維特革命	EKEE
23:00 - 01:00	森美移動	森美 | Leo | 陳強
01:00 - 02:00	妹妹妹妹	WWWINGGG|EKEE
02:00 - 06:00	又愛上子夜場	Law少 | 梁嘉賢
Sun
06:00 - 09:00	一周紅人館	903DJ
09:00 - 11:00	Urban Touch	青木急急子
11:00 - 12:00	my903	麻利亞
12:00 - 14:00	沙漠中的海灘	鄒凱光
14:00 - 16:00	朱薰 E	朱薰
16:00 - 18:00	O 囧 O	Bu
18:00 - 20:00	豁達人潮	Mini
20:00 - 23:00	國語類	Vani
23:00 - 02:00	短期租約	Wasabi
02:00 - 06:00	又愛上子夜場	Law少 | 梁嘉賢

 

睇真啲个节目表，于我嚟讲都无咩大改变！过往weekday我主要听《万世巨星》、《架势堂》同《嘩嘩嘩》，依家只不过係将森小拎咗上去上午，艾粒长到三个钟啫！听咗第一日嘅weekday节目，上午嘅森小果然够sharp醒；但係下午嘅《叱咤叱叱咤》正如佢哋嘅主持人名单一样——太长，有啲磨烂席嘅感觉，占奴两条友到四点几五点左右做到有啲泄气咁，仲要讲正经嘢，太难为两位大王啦！

 

PS. 无记星期日晚9:00新节目《農夫小儀嬉》好搞！係“丧Do男×愚乐I Love U”啰！无记都几无咩创意。

903最近被丧Do！

先有卓韵芝要暂别求学；

继而阿喱辞职到Amusic做总经理；

跟住Mini要用“夏至”呢个朵写更多嘅词，将更多精力放喺音乐上，转做partime DJ；

再有长寿节目《组Band时间》要折埋，Inti离开；

最新有丧Do男Leo谋求新发展，都转埋做partime DJ；Jessie嘅《西崎公园》同《不设划位》呢两个都算係长寿嘅节目都会喺新节目表中取消！

……

我中意听住《芝see菇bi Family》广播剧嚟笑；

我会被喱老板嘅感性声迷倒；

我经常睇Mini TV；

我欣赏少有嘅女operator Inti，同埋姖对香港band嘅热忱；

我对当年森小＋Leo三人主持嘅《森美小仪山寨王》念念不忘，认为呢个组合係无敌嘅！

……

前后唔到一年时间，相继有多为资深DJ离开903，除咗“被丧Do”之外，我谂唔到第二个原因。

Jessie喺blog度回复一位听众嘅留言係咁写嘅：“講真，無論你同我，如果想放闊眼光，都冇必要將自己嘅人生放晒喺903。”

一气呵成听晒《最好的时光》第二章大学篇，好舒畅！

前半段，何淑馨家庭遭遇突变、余傲芝升上大学，两个女仔嘅生活都发生翻天覆地嘅改变！两个人一次又一次走得好近，一次又一次错过，一次又一次谂起对方，呢个剧情几淡淡然啊！倒数第三集，姖哋终于遇上！屈喺心中嘅闷气一次过突出，好舒畅啊！

今一个季（学橡胶龟讲嘢，嘻！），余傲芝嘅性格无乜点变；何淑馨少嘢讲咗好多，成熟稳重咗好多，得人中意咗好多；啲嘢畀Maggie Cheung讲晒；刘小军（方大同）嘅演技太作状，唔得自然；王仲旗band仔做翻band仔，做得好好！

最中意海滩叔饰演嘅卡拉OK老板，同埋佢句口头禅“你知啦”！你知啦，嗰啲表面上尖酸刻薄，实际上好关心何淑馨嘅剧情，真係好窝心咖！

听讲呢，关耀哥本身要演嘅角色“雷震希”因为被扣留喺日本嘅关系，由Donald嘅“萧铭贤”代替咗。不过呢，奴奴始终都係奴奴，硬係觉得佢同阿E嘅戏令我联想到当年《万世巨星励志剧场I Love You Boyz》嘅蔡轻麟同女鬼小倩，好唔啱mood！

妹妹妹妹嘅《最好的时光》真係好有少女情怀，热切期待Season3！

 

PS. 为纪念仲身在日本嘅关耀哥，贴出关耀哥有份影嘅海报，my903绝版咖啦。关耀哥衬“有钱太子爷”形象好多，因为佢真人就係咁呀嘛！

星期四晚睇睇下《东张西望》，赫然发现一个熟悉嘅样飙咗出嚟——阿喱！TVB畀佢嘅title係“唱片公司总经理”！我就真係“当堂吓一跳，然后就得啖笑”！

原来过档A Music係做总经理！太劲秋啦！果然係王劲秋！

1月31号最后一次喺903开咪，3月初就有卫诗涉毒事件咁大单嘢，上任啱啱两个月，摆明考验佢啦！加油啊！张家丰总经理！