★☆薇薇薇薇薇☆★

趁住灰霾警告除低，即刻带住我亲爱的新手机同埋亲爱的人儿去十几年未去过嘅麓湖公园行翻一圈。

印象中麓湖有好多树生到落水嘅，嗯，依家都仲见到！有好多种树，唔同嘅树叶有唔同颜色，绿得好有层次！

好可惜地，好大一段麓湖畔嘅路都係喺马路旁边，行公园都要做吸尘机，点解嘅呢？！

事实证明，我手上嘅只係一部有相机功能嘅电话，而唔係有电话功能嘅相机，于是几乎将所有相都狠狠地Ｐ了一下，效果还可以吧。

除咗下面呢张，纯天然，不经后期加工，蛮有意境的嘛！

地点：都係喺白云山脚

票价：免费噜

首先，恳请大家唔好嘲笑我，今次係我第一次去云台花园，我觉得好靓！因为天气好到非常嘅关系，所以啲相都影得靓到非常！

啱啱入到门口见到喷水池，一阵风吹起啲水雾，一道太阳光照落嚟——彩虹啊！我影到彩虹啊！！！开心到想喊啊！

一路行一路睇……

见到啲石雕，忍唔住要唱起《玛雅民歌》：“da ya ya ~”

室外玫瑰园有玫瑰花。

温室入边有兰花。

仲有好多绿色植物。

云台花园入边有好多广州友好城市送嚟嘅礼物，例如瑞典林雪平市嘅瑞典小木屋同埋德国法兰克福嘅苹果酒酒瓶模型。

每日坐八个钟头办公室的人儿，快快趁周末的好天气出去走走吧！Go！

地点：白云山脚

票价：正价票10蚊

03年之前，广州都有过双层巴士，好有幸地，我都搭过！

当年都未係空调巴士，两边都开窗，偶尔经过一啲种咗树嘅路段，啲树枝係咁叉入嚟二楼嘅窗口，稍不留神，毁容都有份！当然，大部分时间都係安全嘅。坐得高望得远，最记得一次我坐喺二楼，望住窗外啲树喺身边经过听住《风里密码》，自我感觉良好！

28号，广州一巴新穗公司又引进翻一部双层巴士！今次係纯电动嘅空调双层巴士！密封嘅，好舒适好安全！

行538线，经过我屋企，正！有机会去搭翻次先！

长隆大马戏果然名不虚传！精彩绝伦，高潮迭起！

背景、灯光、道具、演员、动物、特技、高低错落有致嘅编排、……

场入边好热……情！表演者热情，观众喺表演者带动下都好热情！大部分都係外国嘅表演者，外国嘅文化，好嘉年华feel！

其实戏肉係——我哋后边坐住一位小朋友，喺一个半钟嘅表演时间入边，台上稍为有少少郁动佢就会大叫：

“哇！劲啊，妈咪！”

“哇！超劲啊，妈咪！”

“哇！有狮子啊，妈咪！”

“哇！有马啊，拉车啊，妈咪！”

“哇！好得意啊，妈咪！”

“妈咪你影相啦，人哋都影啦，几靓啊！你唔影畀我影啦！”

“Wo～Ho～”

“啊！！！！！！！！！！！”

多谢晒佢嘅喝彩声，令台上嘅表演加多几分精彩！佢咁交戏，我觉得长隆应该畀翻钱佢啰！

长隆大马戏确实係“哇！超劲啊，妈咪！”

地址：番禺迎宾路；票价：正价150鸡／人

正佳广场举行紧“哈尔滨冰雪艺术节”，依家广州天口咁热，去感受下都好喎！

入场之前嘅手续係咁嘅：买票－著羽绒衫－睇《入场须知》－工作人员开门－入场

买咗票之后，有会场提供嘅羽绒衫，有红、黄、蓝三种色供选择，成人每人一件，儿童每人两件（可能惊冻亲啲细路）。入去影相嘅话，梗係拣红色啦！影相必备红色衫！嘻嘻！

著好衫之后，我周围望揾紧边度有门入场呢咁，工作人员指一指道墙，话：“呢度入呀！”原来里面要保温嘅关系，用咗好厚嘅材料做墙同门。

一入到去，每个人都会讲一句：“哇！好冻啊！”正佳开空调，算佢26℃，会场入边係-10℃，温差有三十几度啊！

里面比较暗，冰雕入边藏咗霓虹灯，唔识处理啲光线，而且又因为冻到手指几乎僵硬嘅关系，影啲相麻麻地！

第一眼就见到selling point——变形金刚！

第二眼就係亚运元素——乐羊羊、亚运Logo。

跟住有《冰河世纪》嗰班friend！

仲有呢个艺术节嘅三宝：冰床、冰马桶同冰屋。所有电视、报纸、网站都係劲推介呢三宝！

冰屋入边确实好暖！

有两个冰滑梯，一个係矮啲嘅大笨象滑梯，一个係高啲嘅彩虹滑梯。

啲冰好滑，sir（我真係唔知个“sir”字点写）落嚟好快！好好玩咖！全场最好玩呢个！

仲有其他各式各样嘅冰雕作品。

入边真係好冻！我同我妈一齐入去睇咗大半个钟，我妈话冻得滞顶唔顺走咗出去，得翻我自己一个喺入边慢慢睇慢慢影，用森美大哥嘅说话：“真係冻到无朋友啊！”

会场面积唔算大，大概四百平方；冰雕大概一百多座，有大有细，唔係太有气势唔係太精致，但係对得住30蚊／张嘅门票价格嘅，OK嘅！

地点：正佳广场四楼中庭

时间：2009年6月27日～8月31日 一至五12:00～22:00 六日11:00～22:00

票价：普通30蚊／学生20蚊／1米2以下儿童15蚊（一次性买10张以上普通门票有8折优惠喎）

最近全广州都为紧一套国庆巨献《秋喜》开绿灯，先封海珠桥，拍炸海珠桥场面；再封长堤大马路，搭个景，拍解放军进广州城嘅壮观场面。之前海珠桥个景错过咗，今次长堤咁得意，我知道之后梗係去睇下啦！

长堤嘅景主要係从9中（长堤真光中学）到爱群一段。最劲嘅，就係喺爱群门口搭嘅“广州市人民庆祝广州解放”牌坊，上面仲有国父孙中山同毛主席嘅画像。（详见《羊城晚报》6月27日A1版）

我去到嘅时候，牌坊仲喺度，但係上面嘅字同画已经拆咗。好彩，气势还在！

一段长堤都插满红旗，好有当时全市人民兴高采烈嘅气氛，好喜庆！

最有趣嘅係成条路嘅文字都变成繁体字！喺今时今日嘅广州成条路都见到繁体字

路两边骑楼上有好多古装广告牌！早期嘅彩色平面广告，啲广告画好係旧时嘅风格，而且都几有创意咖！

古装嘅广告招纸，好似依家嘅“牛皮癣”咁周围哒，几好笑咖喎。啲字係从上至下右至左咁写嘅，而且啲路名係写古装路名添：太平南路啊、中华中路啊，我老豆话太平路係依家人民南太平桥附近喎。犀利啊！

以前啲产品名真係古灵精怪！黑鬼油、寿星公炼奶、铁肺胶、水泡糖（似乎係“有个圈的薄荷糖”嘅亲戚）、……最劲係可以助消化、解口渴、香口气、治屙呕、止肚痛、排障疫嘅“必得胜丹”！哇！个名劲到爆炸！

又有古装铺头招牌。

畀我家两老睇过啲广告、招纸、招牌，佢哋话都嗰时真係有呢啲酒楼啊、公司啊、寿星公炼奶啊、黑鬼油啊呢啲产品，相信剧组係做过资料搜集。

除咗招牌广告，仲有两个道具都好得意——长堤大马路路牌、古装交通岗。

各种道具都只能够睇正面，因为背面好样衰。

仲有路两边原本嘅霓虹灯、射灯，都用红布遮咗起身。但係嗰啲分体式空调似乎都无遮到，咁做后期，係咪要一格格菲林擦呢？！

唔知《秋喜》呢排嘅封路拍摄係咪都係宣传手段之一，如果係，我觉得佢哋好成功！因为连我都越嚟越有兴趣睇呢出戏喇。

一年一度广州国际龙舟邀请赛，今日喺“海印桥到广州大桥之间嘅珠江水域”进行！讲到咁大，实际上只係喺二沙岛星海音乐厅、龙舟赛主席台对出靠近河北嘅几百米范围内。我就从海印桥脚，一路行过去中大码头方向，咩都睇唔到啰，嬲啰！

因为距离主会场太远嘅关系，我连龙船都睇得唔係好清楚，更莫讲话知道边队赢边队输。但係同一大班广州人喺珠江边望住啲龙船、应下端午节都几开心嘅！同埋呢，二沙岛嘅星海音乐厅真係几有型！

出于安全考虑，参加比赛嘅选手都要著著住荧光橙色救生衣，于是喺江面就见到係见到一个二个“橙波波”喺龙船上面扒下扒下，睇唔到肌肉仔同肌肉佬。

感觉下面呢张相影到好似用咗移轴镜头咁feel，呵呵呵，暗自高兴中！

我睇到对面主席台前有几条横幅，係今次嘅赞助商：黄振龙、中国移动、健力宝、天河城百货、大家乐！唔明点解大家乐要赞助，难道佢哋即将推出“龙船饭套餐”？！

由于河南呢边实在太晒、今日天气太热同埋距离主会场太远，深深咁觉得畀市政府水咗，我睇咗一阵就走咗噜，睇唔到我最想睇嘅“大龙凤”游龙表演！可惜啊！净係喺开赛之前同呢条“万菱”彩龙有过一面之缘，果然係缘分！

其实呢，喺海印桥脚都有好嘢睇嘅。嗰度停住好多部各龙船队嘅船，呢啲船係运啲龙船嚟嘅，即係龙船坐嘅船，来自鸦岗、石井等广州近郊村镇。船上边有“是啤”船、装饮用水嘅大水桶、兰花、厕所、衫、裤、樱雪沐浴露、人、铁链、国旗、洗衣机、鱼骨天线……应有尽有，大开眼界，不能尽录！

仲近距离睇到一个龙头添！开心！

好啦，水我一年就够喇，明年我会再嚟珠江睇龙舟赛嘅，我会过二沙睇咖啦！希望明年唔好又换地方，再水多我一次啦！多谢晒！

文德路上有一座比较低调嘅建筑物：外面围住围墙，围墙入边有个小池塘，建筑物前面、池塘周围停满晒车，外边种咗几棵大树，真係好低调！

行近啲、认真睇佢嘅结构係典型嘅、精致嘅装饰就知道佢劲！旁边有棵凤凰木，几有意境。

呢度依家係“广东省古籍保护中心”同埋“广东地方文献中心”；以前係咩，就不得而知喇！不过喺外墙有两块石碑，算係呢座建筑物嘅“出世纸”吧。一块写住“廣州市市立中山圖書館奠基石 中華民國十九年一月 林雲陔敬題”；另一块写住“林克明建建筑築師設計 一九二六年十二月”。

里面一楼係类似儿童图书馆嘅地方；二楼係地方文献嘅图书馆，可以外借书籍。连接住一楼同二楼嘅，係一条木楼梯，扶手、装饰、梯级都係木。里面嘅门口都係木门，係古代嗰啲有窗花加油纸，然后一笃笃穿层纸可以偷睇入边嗰种，不过换成磨砂玻璃。

其实呢度无咩睇，唔係太得闲同埋太顺路嘅话，我都唔係太推荐。如果要写关于广东、广州嘅论文，呢度可能有有用资料。

地址：文德路车站后边；票价：免费

朋友係淘宝嘅fan，知道呢两日喺流花展馆有淘宝主办嘅“首届网商交易会”，约埋我一齐去。

我都係第一次去流花展馆——广交会旧址，估唔到比隔离嘅锦汉大好多！但係入边都係一啲普通展销会嘅格局，一个个商家一个个档口。老实讲，啲产品嘅款式有啲大笪地feel，我哋嘅都兴趣不大啰，越行越慢。

直至行到一个玩具商家嘅铺位，见到啲公仔好得意，我哋至有翻啲精神。

睇完，经过锦汉，呢度举行紧“房地产博览会”，顺便入去转咗一圈，呢度仲精彩！房地产公司有钱啊，舍得花钱装饰展位！好靓好靓！有行豪华路线嘅，有行街坊路线嘅，有行环保路线嘅，有行温情路线嘅，……

最吸引嘅係富力嘅全木广州地图模型！一河三岸都有齐！好精致！

人民桥

人民桥

沿江路大钟楼

南方大厦

沿江路

西堤二马路

文化公园

文化公园

起义路

中山五路

中山五路

北京路附近

东山农林下路

东山农林下路

人民中路

解放北路越秀公园

解放北路越秀公园