★☆薇薇薇薇薇☆★

沙滩上，夜晚例牌有人放烟花放孔明灯！

满天都係孔明灯，加月光一大个！

火树

银花

中秋夜嘅沙滩上，更会见到“彩云追月”嘅美景！

好喇！最后送上我亲笔手绘嘅沙滩画两幅！

左边一幅名为《沙滩上的小花》。原本画咗另一朵更加靓嘅小花，但係一个浪冚埋嚟……无咗！我崩溃！

右边一幅名为《埋岸的龟》。此画表达了一只从海中上岸的龟热爱生活、热爱大自然之情！

掌声，唔该！多谢晒！

去到海滨小镇当然食就地取材嘅食物——海鲜！

所有海鲜都係呢啲渔船打上嚟嘅！日出而作！渔船上咗嚟，先卖去大排档、再卖去鱼市场。

呢度有一条路叫“霞景路”，係海皮嚟嘅。一边係岸边，有一排卖海鲜嘅档口；另一边係一排大排档！

大亚湾嘅海鲜会比广州嘅平一至两成左右，买咗可以攞去大排档煮，加工费10至15蚊不等。呢啲咪叫做“有钱齐齐揾啰”！而咁多间大排档之中，首推“海滨饭店”（霞景路14号），因为佢哋有一个健谈嘅阿妹，个厨煮嘢又好味！十粒星推荐！

左至右、上至下：

花甲、大蚬、青口（好新鲜好甜）

海胆蒸蛋（食唔到海胆）、椒丝腐乳炒通菜（青绿农家菜）

泥虾（当地有名）、青蟹、濑尿虾

坐咗四个钟头车，经过大亚湾石化区，嚟到霞冲！哇！个天係灰色嘅！想点先？！作为一个以“阳光、沙滩、大海”为selling point嘅地方，都几无heart喎！

谂真啲，呢度係工业区嘅一个小角落，仲要係劲污染嘅石化区，好多悬浮颗粒悬浮喺空中。喺沙滩上都见到石化区入边各式各样嘅建筑、设备，好似科幻片咁！有乜办法唔灰呢？！

坐船出去离岸嘅海岛，虽然继续科幻片，但係天空清咗好多！

呢度叫“鹅洲岛”，水绿天蓝，终于似样翻啲！喺离岛，终于可以见到“蓝和白形成了天”啦！

影咗两张自己觉得好劲嘅相！你哋睇下嗰啲水滴，几生动！

呢度係“宝塔岛”。宝塔岛上有一座塔。宝塔岛无咩睇，但係宝塔岛上可以睇到好多嘢！可以远眺霞冲镇、码头、南海度假村、熊猫金海岸……

第一次影全景相，无用三脚架，效果麻麻地。

坚持做年轻人最中意做嘅事情——影个影！

沙扒湾＋月亮湾，好好玩！真心好玩！天气好、风景好、朋友好、心情好！

海边自然有渔船、鱼排、蓝天、大海！

月亮湾嘅沙滩上，有好多人，大家都著到鬼火咁靓，花花绿绿，好缤纷、好出彩！蓝天、阳光、大海、沙滩、月亮，正！

我都有做时下年轻人最中意做嘅嘢——影个影！

月亮湾係沙滩，而沙扒湾係石滩。麻麻地靓，不过都好多嘢睇！

除咗阳光与海滩，晚黑我哋仲烟花同孔明灯添！第一次放孔明灯，大成功！

香港打9号风球，我竟然仲要去咗香港！感受下咩叫“打风”！

可能因为打风嘅关系，过关都无乜人！无人到我从来未遇到过咁少人！去嘅时候前面得十个八个人排紧队，走嘅时候甚至我一入到出入境大厅就可以行埋柜位度！

其实风唔算大，雨都无乜，甚至仲时不时见到阳光添！係行到有啲十字路口会好大风，大风到我企唔稳啰！香港嘅风，真心劲！

喺9号风球之下，仲有外国人坚持喺尖沙咀练跑步添！畀啲掌声！

行到上海街一个街口上，向西边望过去，见到一栋楼个顶渐变式无咗！可能外星人嚟接佢哋走！

9号风球，香港前前后后左左右右上上下下嘅铺头都关晒门，唔係游客区嘅上海街关晒门，旺至最旺嘅旺角、弥敦道都关晒！旺角净翻少量嘅药房同数码产品铺头仲坚持开住！戏院、食店、麻雀馆生意兴隆！我最心爱嘅唱片店同书店全部都唔开！

差唔多条条街都有若干把烂遮畀人遗弃喺街头！

其实香港啲环境都唔错，到处都见到雀仔。麻雀仔最多，仲要唔多怕人嘅！

到下午，大部分巴士都停晒，大家都唔使做噜！

行过尖沙咀天星码头，好多电视台嘅记者喺度现场报道风暴消息，无线、亚视、有线、凤凰、Now，全部台嘅记者同摄影师都堆埋一堆，买晒啲麦记可乐同食物摆到一地都係！啲记者们上身会著得好靓，下身著七分裤同拖鞋，造型比较搞！

实不相瞒，今次去香港，其实我係想去MegaBox睇《你个样样》！无得睇，唯有四围行！

行行行行行，唔知点解行咗去朗豪坊！见到栋喺一楼块牌，于是嗱嗱声上去四楼通天广场，参观下丧运会场地！果然够丧！

然后再行行行行行，行咗去庙街，仲行到去庙街座“庙”！我一见到，马上谂起克勤同Edmond于上世纪拍摄嘅《庙街孖兄弟》！近啲嘅有，《六楼后座2》，Suzy嘅丧礼！就係呢度！

虽然今次买唔到想买嘅嘢，睇唔到想睇嘅嘢，但係感受到香港嘅8号风球同9号风球crossover嘅厉害！同埋日光日白到处都无人无车，撞鬼一样嘅香港！

无西洋菜嘅西洋菜街係我哋嘅主要目的地！果度有SaSa、卓悦、丰泽、百老汇、书局、CD铺、……呢堆店已经满足晒我哋每个人嘅愿望！同你分享下我嘅愿望啦！

另外，……

OK便利店内外，full of 森美大哥！太得人惊啦！

惠东之行一次过满足晒我三个愿望：玩定向、去沙滩、住帐篷！

早喺几年前，定向运动入广州无几耐，我就觉得好有趣。一来因为懒，二来真係因为苦于揾唔到门路参加。今次跟住朋友嗰间户外运动公司喺巽寮湾玩咗一次海边定向。我同Schuman（呢个英文名，Good！）一组，我哋两个都未玩过定向。结果，正如我哋预言嘅一样——阻住人哋收工：最后一个番终点，揾唔晒啲点。纵使係咁，我哋都获得咗今次活动嘅季军！呢个协会真係厚道！其实，喺揾点嘅过程中非常有趣！啲点布设得好过瘾，我哋要行沙滩、上山落山、过河过桥、入树林，仲有一个点喺个坟度！除咗要揾点，仲要回答问题，呢啲就要睇玩家嘅底蕴喇。

每年最后一日嘅日记，我都会写一啲愿望，希望来年可以实现。“去沙滩”係写咗喺几年嘅日记入边咖喇，一直未实现。惠东一带都係沿海地区，好多海滩！我终于第一次踏足沙滩，feel到咩叫沙细如尘！除咗鞋行落去真係好舒服！第一次兜口兜面见到海浪！几米高嘅浪係咁冚埋嚟，岸边嘅石头都畀浪冲到奇形怪状。个海真係好靓！因为低调嘅关系，我不禁喺心底大嗌一句：好靓啊！！！另外呢，啲浪冲埋沙滩，会将人脚下低嘅沙冲走，人就企唔稳，如果大浪啲，真係好容易被卷走！所以呢，欺山莫欺水啊！

仲有一个吸引我参加呢次旅程嘅就係可以住帐篷喇，唔係普通住，係住喺海边！几劲啊！不过，住完今次之后，我以后会尽量避免住帐篷咖喇。因为我深深体会到，住帐篷同露宿街头係无乜分别！我哋喺帐篷入边讲嘅，隔离可以听得清清楚楚；相反地，外面有咩动静，我哋都了如指掌。瞓到差唔多天光嘅时候，我听到有摩的佬拉客：“五蚊车你去睇日出，去唔去？”以为住海边，懒浪漫，点知啲浪“唅唅”声，嘈到我成晚瞓唔着！到深夜，差唔多所有灯都熄晒嘅时候，真係可以睇到漫天星斗！多到数唔晒咖！哇！靓到呢！！！我记忆中试过三次睇到个天咁多星：第一次係旧年年中，去咗开发区污水处理厂实习，瞓喺张床度望出去；第二次係旧年年尾，喺实验室做实验做到九点左右，上楼顶关抽风机，抬头就望到。今次係第三次，係最多，最光，最大粒，最靓，最劲嘅一次！！！

旧年上《环境教育》课，老师畀一个模拟城市我哋，要我哋规划。我哋帮我哋组个城市改个名“美在花”，成个名就係“美在花城”。呢个唔係重点，重点係我哋当时畀咗一个主题呢个城市——旅游。一个城市只要有一个主题，就好容易名利双收。结果，我哋组被老师评为係规划得最好嘅。

正如澳门。虽然佢得豆腐膶咁细，但係佢嘅赌博业发展得鬼咁好。于是，就会有大把大把嘅游客去旅游消费。即使好似我哋呢种唔赌嘅人，都无拉拉去旅游睇嘢。

行係澳门嘅街头，觉得同广州差唔多，都係四围都係铺头，四围都係人，四围嘅人都係讲粤语。

去过澳门之后发觉，原来广州係一个畀高架桥冚住嘅城市。近十几年，广州嘅高架桥唔觉唔觉越起越多，大部分嘅路都有高架桥，成个广州都差唔多畀高架桥冚住。城市上边唔係天空，而係灰色嘅高架桥，真係一件几令人唔开心嘅事。

除咗烧到得番度门嘅大三巴，澳门仲有好多陈年建筑物。华洋集处，建筑物都很有特色。起新肯定要拆旧，眼见澳门都係新旧建筑和谐存在，唔知澳门拆旧屋嘅时候，以咩为标准保留，又以咩为标准要拆嘅呢？会唔会出现依家广州拆迁恩宁路，大家七嘴八舌讲唔停呢？

澳门细，啲路亦都好窄。但係咁窄嘅路，喺中间都有绿化带。而且绿化带绝对唔hea，有花有草有喷泉！诚意绿化带嚟咖喎！

之前去旅游，都无一种去完想再去嘅感觉，澳门有。希望以后再有机会，慢慢细琢呢个城市。

是日，与相识三年之同窗友人一同出游。此乃毕业之旅行。全班为此已张罗两个月之久。终能出行，确实开心！

晨，旅行车开至学校接人，殊不知，此排多野鸡车出入大学城接送返乡之学生，警察误以为吾车同为野鸡车遂上车查车。导游先生及首领灿英需出示相关证明，证明车非野鸡车，人非野鸡人。终了，警车开道，送吾等上高速。

车至目的地河源，上来地陪导游先生，一轻浮多嘴仔。吾对其一直持嘴渺渺态度。直至临走前，其表演一段MoonWalk，吾由衷赞叹：“哇！咁叻嘅！”旁友人笑问：“你讲真咖？！”吾答：“係啊！MoonWalk喎！奴捞都要练两个月啦！”原来地陪导游先生亦有点料。

玩得最开心之一part，乃全班于万绿湖上划竹排也。脱鞋、脱袜、拉高裤脚。起先，与粉然不敢落竹排，恐一踏足，竹排翻转，两人便落入靓但冻之万绿湖中。两人于岸边鬼刹咁嘈，聪与容喵终伸出援助之手，携我俩踏上竹排。因吾确实恐翻船，故禁止与吾同船之容喵站立以及做出摇晃竹排之动作，但徒劳。旁竹排上某同学船桨跌入湖中，欲捡起，事与愿违，桨越飘越远。其求救于吾，吾之手短于其，更难为之。旁人聪捡起桨，作一“车”过去状，吾笑至咇眼水！后吾与粉然之竹排率先绑于一起，随后其他竹排纷纷效仿，终六只竹排绑于一起，吓至岸边管理员大叔目瞪口呆！全部人终变开心黐线仔！

除此之外，全亚洲最高之喷泉亦令吾等惊叹！肥仔班长更于苏家围中娶得美人归！恭喜恭喜！

省内游多为扶贫之旅，但毕业旅行之意义不在于地点，而在于揾一地方一班人hea，拍照，倾偈，大笑！

PS：扮写文言文，最终写唔落去，哈哈哈！

此照片摄于万绿湖旁。名为《乜水？！》。请从左至右阅读图中人之对白，谢谢合作！