★☆薇薇薇薇薇☆★

今日学校校庆，例牌翻去八卦一下，四围影下相。

惊叹时间真係过得快，我仲清楚记得旧年翻去嘅情景。今年各位老师升职嘅升职，出差嘅出差，净係见到一位熟悉嘅老师！同学们又各有各忙，净係见到几位铁杆嘅同学。

学校门口好有气势！学校嘅title多到不得了！

学校多咗好多绿色植物！而且好新鲜，甚至比好多公园都靓！三楼平台依然有玫瑰园！

同时，都霸多咗好多地方，起咗体育馆、体育场。

今日至发觉龟岗确实好正！坐下hea下吹下风吹下水！后悔当年唔识落嚟叹！

高三嘅课室中，一栋栋书，……

你有几多张会员卡啊？

翻翻柜筒底，据我自己嘅不完全统计，我有旅游、饮食、家俬、药房、医疗、唱K、睇show、化妆品、电器、晒相、……各式各样，共14张会员卡！

有上网申请嘅、有买买下嘢申请嘅、有随杂志附送嘅、有人哋畀嘅、有睇演出时当场申请嘅、……

有啲係因为消费有得打折，所以申请；有啲係因为张卡太靓，忍唔住申请。

我最中意下面呢3张！

一张係宜家家私，一张係Neway K'Fun卡，呢两张卡都半透明，K'Fun卡仲有一个大圆角添，虽然一次都未用过！W·思创作社係河东狮嘅会员卡，既然係文化传播公司，会员卡嘅设计都好缤纷多彩！

最近翻翻柜筒低，发现咗啲战前文物，自己觉得好劲，要攞出嚟炫耀下！係我份高考成绩单同埋录取通知书！

六年前嘅六月，我参加高考，考考考，考完！

大半个月之后，一个行雷落雨嘅下午，打电话去高考成绩查询热线，嗯，听到一个我自己比较满意嘅成绩，好高兴！至于翻学校攞成绩单嘅情况，我唔记得咗噜。

再过咗一个月，一个我躝咗出街嘅日子，翻到屋企，发现多咗个信封，入边放住属于我嘅大学录取通知书；同埋半边烧鹅，老豆话要斩料贺一贺佢喎！

今时今日睇翻份录取通知书，发现读完四年之后，我发觉呢四年之间，广州大学发生咗好多嘢，以致大部分资料同入学嘅时候完全唔同！

入学嘅时候，我哋专业係属于“生物与化学工程学院”，有同学仔叫我哋做生化人；

大二嘅时候，“环境科学与工程学院”成立，我哋专业就成为咗呢个学院两个专业之一。

入学嘅时候，我哋喺桂花岗校区读书，喺嗰度渡过咗两年，记得重阳节去后山上课，懒係话登咗山应咗节；喺综合楼上体育课踢毽耍太极；喺信息教学楼楼顶嘅潜建嘅铁皮屋上数学课，唔听课不但只，仲倾计嘈住前面嘅魔头听课；夜晚上选修，望得到远处花果山嘅广州电视台同埋电视塔上面嘅本田广告灯；喺生化楼上课，一班人入lift挂住倾计唔记得揿lift，入咗去好耐都唔郁，以为困lift；……

大三嘅时候，广州大学广园、桂花岗、麓湖、起义路、龙洞五个校区全部搬晒入大学城！哇！大学城真係大到晕！

入学嘅时候，我哋广州嘅同学仔都係“非住宿生”，无办法啦，学校唔够宿舍嘛。于是，如果啲课程安排成上午有课下午又有课，我哋班走读人就揾嘢嚟搞！有功课就一齐做功课啰，学习气氛好浓厚咖，特别係考试之前抱佛脚嗰下；平时最中意嘅消遣就係喺课室锄大地，斋锄，唔记分；

大三嘅时候，入晒大学城喇，全部人住宿！住宿环境好好啊！有我最中意嘅柜做楼梯设计，四个人一间房，全部都有中央空调，好叹啊！

四年大学，我最最最后悔嘅就係，竟然唔识玩拖拉机！

事缘上星期六，我会喺屋企阳台帮啲孔雀鱼换水。通常，我嘅做法係将啲鱼从鱼缸瓢落个盆度，跟住洗鱼缸，然后放翻啲鱼落鱼缸。上星期六亦然。但係当我洗干净个鱼缸，准备放翻啲鱼落鱼缸嘅时候，我发现原本係三条嘅孔雀鱼得翻一条！周围揾都唔见，而且又无水痕！短短三分钟时间就唔见咗！当然啦，我有问过唯一嘅当事人——剩低嗰条鱼，佢嘅态度话畀我知：“咩事～我咩都唔知～”密室逃脱案！

过咗两日，我又从鱼档买咗一公一乸两条孔雀鱼翻嚟放入鱼缸。当晚，我临瞓之前喺屋企行行行，行过鱼缸正想喂啲宵夜畀佢哋叹下嘅时候，发觉原本得三条鱼嘅鱼缸多咗十几条鱼仔！嗰条乸孔雀鱼生仔啊！

孔雀鱼生仔我见过几次，但係一次生咁多真係第一次见！哇！散到成缸都係鱼仔！好彩我屋企长年有一个“幼儿园鱼缸”（一有鱼BB就放喺嗰度养），我用老豆一个攞住KFC雪糕羹一个攞住饭壳喺度瓢，啲鱼仔又鬼咁醒目周围弹（我觉得啲细鱼唔係游嘅，係弹嘅），瓢咗半个钟终于将所有鱼仔成功转移！

WOW！一次过生咗差唔多廿条鱼仔啊！犀利啊！

多次经过移动营业厅外面嘅玻璃墙，见到一张“旧潮物，新登场”海报，大致内容係打电话下载谢安Kay嘅《囍帖街》彩铃，就有机会获得5月31号喺广联礼堂举行嘅“谢安琪《呐喊》歌友会”门票。请留意，只不过係“有机会”啫！

今日再次经过嘅时候，决定一试。企喺营业厅门口按照上面指示，打电话，半分钟之后收到两条短信。第一条：提示我已经成功定制《囍帖街》彩铃，扣我两蚊；第二条，恭喜我获得“谢安琪《呐喊》歌友会”门票两张，凭短信5月20日前去地王嘅移动营业厅领取。

当时，我有三个怀疑：1、似乎好容易中咁喎！2、从来无“抽奖命”嘅我真係中咗？3、係咪真係凭短信就有两张门票？

我嗱嗱声叫咗几个朋友都打电话去试试，点知，姖哋都唔得。收工之后，我去咗地王，果然有两张门票送到我手上！

于是，我电话嘅彩铃就係《囍帖街》啦！于是，我就有咗两张可以听live谢安琪嘅门票啦！

综上所述，我今日真係好好彩！我唔知应该多谢边个，总之，多谢晒！爆怒超劲开心！

今日喺街上，行行行行行，凸然见到书报亭一堆报纸杂志中间，有我个朵——薇！

思考咗0.01秒，决定买低2009年5月号（2009.MAY）！WOW！

翻到屋企，用咗10分钟揭完本杂志，发现除咗个名啱睇之外，大部分内容都係一般般，肤浅嘅我都係睇翻《可乐》算啦。完！

我依家住紧嘅楼，係上世纪八九十年代最盛行嘅单位自建宿舍，係我老豆单位嘅宿舍。楼下原本有一大块空地，唔知几时开始，有人担啲泥番嚟，揾啲砖头围一个圈，买啲种子番嚟，就开始种起各种食得嘅嘢。你种一啲，我种一啲，呢大块空地逐渐成为咗大块田！

大家真係乜都种得一餐，菜心、生菜、芹菜、油麦菜、卷心菜、豆角、芥兰、木瓜、葱、白萝卜、红萝卜……应有尽有！

记得有一晚，我打的翻屋企，司机一转入嚟，见到大块田就好感叹咁讲咗句：“哇！世外桃源啊！”我心谂：“你会唔会太夸张啊，的士大佬！”当然我只係心谂啦。

本来打算忍住唔讲，但係都係忍唔住：下边呢张相啲菜，好似“开心网”个花园啲菜！呵呵！

前几日，出街经过大块田嘅时候，赫然发现有支竹撑起一张纸：

纸上写住“需要芹菜者请自摘，不要客气。”平时出出入入见到呢位芹菜伯伯，我都会同佢打声招呼，佢例牌会回我一句“上班啊？”或者“落班啊？”具体用边句，就要睇我行走嘅方向喇，然后我哋会寒暄几句。其实，其他相熟嘅街坊种到嘢，有时都会畀啲我哋嘅，只不过我估唔到伯伯今次咁出位啫！呵呵！

最近有报道话广州係“最冷漠的城市”，观点与角度问题，起码我啲街坊唔係啰！

是日White Day，亦是峰哥哥大婚日子，恭喜恭喜！

祝福两位白头偕老！相亲相爱！早生贵子！

同屋企人共同度过咗充满喜庆、好好好开心嘅一日！

饮杯新抱茶，富贵又荣华！

顺祝各位身体健康！万事如意！

琴日、今日、听日、后日一连四日，香港贸易发展局喺锦汉举办“香港潮流商品展览会”。有苏施黄帮手卖广告添！（幻想紧图中阿苏其实係讲：“泰山！仲唔过嚟帮我攞住一袋二袋！想重死我咩？！”）

大家从报纸、电视、电台都了解到展览会嘅盛况。香港贸发局经常会邀请我哋公司经常会参加佢哋嘅活动，今次都唔例外，收到贸发局邮寄过嚟嘅“买家证”。

作为一个想做潮流人嘅人，我都好想入去睇下！今日下午，好好彩地，凭住我哋嘅买家证，我同我同事可以唔使排两个钟头长队，唔使受人流管制，直接从后门入场。搞到我哋两个暗自高兴咗半个钟头！

入到去，见唔到“潮流商品”，净係见到人、人、人、人、人、人、人、人、人同埋人！我哋个个都係“潮流人”啊！人潮、人流里面嘅人呀嘛！我谂起《黄金少年》嘅“游浪潮”啰，无嘅，纯粹係个名fit啫！

工作原因，我哋经常会参加展会，但係咁多人嘅展会我都仲係第一次！而且，我唔明白，点解今次会叫“展览会”而唔係“展销会”呢咁？！逛完一圈，发现无嘢啱买，珠三角货品港币价钱。广州人坐车落香港都只不过係两三个钟头嘅时间，喺香港人民币兑港元仲有汇率优惠添，何必呢？！

无买到嘢，但係见到黄长兴（定係黄长发呢？分唔清佢哋两兄弟！）同YoYo陈自瑶喺台度示范整法国菜！YoYo好投入挂住整嘢，睇咗好耐都见唔到姖正面，唔开心！留意主持人，有啲似张继窿！

第一次参加好朋友嘅婚礼！第一次做姊妹！好兴奋好开心！

朋友俩夫妇识咗廿几年，我哋就识咗佢哋几年，一直觉得佢哋似小学鸡！估唔到（其实都估到）两个小学鸡咁快结婚！恭喜恭喜！

攞开门利市、玩新郎、敬茶畀新娘家长辈、行大运、拜祖先、敬茶畀新郎家长辈、迎宾、敬酒、敬茶、送客、……好多好多事情！全部都係幸福嘅事情嚟嘅！

除咗呢啲正经事，我哋呢班粉人仲喺空档时间，搞咗好多事！例如，有人帮新娘挽住婚纱嘅裙摆，奈何新娘要影相，姖只能鬼鼠地缩喺新娘身后；有人要行埋部高级靓车度谂住影翻张“香车美人”相，点知姖行埋部车度摆铺之际，部车开郁咗；有人好中意新人屋企嘅胶花，起势同啲胶花合影；有人见到一杯可口可乐，兴奋到倒泻咗隔离杯红酒落张雪白嘅台布度；有人偷咗另一个人嘅嘢食，食咗一啖之后发觉唔好食，放翻喺嗰个人嘅位置度，嗰个人唔知继续食；有人企图影一张扮千嬅嘅相，但係影咗一日都无一张似样；姊妹帮手斟新抱茶嘅时候，将“饮杯新抱茶，富贵又荣华”当成口号嗌，伴娘仲数一二三添，嗌到后尾几围，有人甩咗beat，有人已经笑到讲唔到嘢；……

其实我对于所有婚礼仪式係一无所知，好彩所有事情都喺婚礼之前一个星期喺新郎嘅带领之下搞掂咗！所有事情都有条不紊咁进行！做过一次姊妹之后，确实成为咗半个八婆！做好朋友嘅姊妹好攰好靓好high心好幸福！

部长、部长生，祝福你哋白头到老！永结同心！情比金坚！