★☆薇薇薇薇薇☆★

我咩都无讲过……

总係感觉狗尾草係夏天嘅标志。

印象中玩狗尾草嘅时候通常身上都係黐腻腻嘅，面仔晒到红卜卜，狗尾草撩过嘅地方痕痕地。

细个嘅时候，行过见到，最中意摘一条落嚟揸喺手上，用嚟撩下朋友仔、用嚟撩下猫仔、用嚟周围撩、……总之一条狗尾草就足够我哋玩一个下午、笑一个下午、开心一个下午！

（夏天太热啦，啲字都要间疏啲，唔使逼埋一齐咁热！）

1、仲係艺人嘅梁洛施曾经被包括徐克、詹瑞文、彭浩翔等多位前辈点名赞赏过姖嘅演技。

2、虽然话姖有一个强劲嘅后台，但係够胆同英皇对立，真係好够姜！大快人心！

3、可以揾到踏破铁鞋卢觅雪咗姖发言人！我唔明姖哋係点样合作上嘅。PS：Michelle依家早上喺港台开咪，肥妹fan屎可以继续支持。

4、梁洛施怀胎十月都无人发现，避得过所有狗仔队！

5、20岁就有细路！

6、最劲最劲最劲呢个——姖个仔係李嘉诚个孙！我赫然发现野仔嘅《金至坚》係唱紧姖个B，尤其係嗰句“仲有几千亿我仲有几千忆，我未够廿六老豆佢就想分身家畀我”！

讲真，咁大个人，你知唔知一二三四五嘅“五”广州话係点读咖先？因为公司喺05室嘅关系，叫外卖报地址畀人哋，我话“零五[ng]”嘅话，人哋一係听唔清，一係听成零二。无办法，我只能读翻懒音“零五[ｍ]”。

广州人啊广州人，呢头话要捍卫粤语，嗰头十有八九都有懒音，想点先？！

留意下，唔[m4]同吴[ng4]係唔同音咖！“唔”[m4]係合埋口发音；而“吴”[ng4]係擘口放下巴舌尖顶下颚发音，同英文中字母ng嘅发音/η/一样。我哋日常讲嘅粤语之中，得“唔”係“m”音，其它都係“ng”音，包括：梧（桐）、蜈（蚣）、吾、吴、忤（逆）、五、午（间）、伍、误（会），呢几个係比较常用嘅。

今期热播剧集《老婆大人2》陈锦鸿饰演嘅角色——葛国光。“国”[gwok3]同“光”[gwong1]，中间都有个“ｗ”音，唔好读成“葛角[gok3]刚[gong1]”！类似嘅仲有：郭[gwok3]、广[gwong2]、过[gwo3]等等。用拼音係分辨得到，国（guó）、光（guāng）、郭（guō）、广（guǎng）、过（guò），都有个“u”喺中间。

同理，有一款係“n”音同“l”音。你[nei5]，唔係理[lei5]；男[naam4]女[neoi5]，唔係蓝[laam4]吕[leoi5]。你（nǐ）、男（nán）、女（nǚ），拼音都係“n”开头，所以粤语都有鼻音。

仲有嗰啲“讲”[gong2]读成“赶”[gon2]、“橙”[caang4]读成“产”[caan4]、“北”[bak1]读成“不”[bat1]、“旺角”[wong6][gok3]读成“won葛”[won6][got3]嘅人，唔知仲有无得救！

广州人啊广州人，请你哋读啱广州嘅“广”[gwong2]字先啦！

两年前我写过一篇类似嘅日志，今次只係稍作修改啫，因为我真係唔抵得人哋满口懒音仲喺度嘈嘈嘈嘅人，讲完！

我好中意海珠桥，因为佢历史久，故事多，结构精致，造型特别，係广州嘅形象代表之一。但係呢排隔三差五就有人喺上面搞跳桥show！

琴日收工，海珠桥又有人跳桥！上个星期四中午，海珠桥有人跳桥！喺网上睇到呢段话：“据不完全统计，从2004年至今，报道过的跳海珠桥事件(未遂)16次，遥遥领先同一江面上的人民桥(5次)、解放桥(4次)、海印桥(3次)。今年以来便发生5宗，高于历年数字。而且这些跳桥者均‘成功获救’。”

记得几个月前，经过河南某路（实在对河南嘅路唔熟），见到一间铺头门口旁嘅墙上，写咗咁样一行字：

具体成效唔知，但係起码写出嚟，明确呢度唔係呕吐嘅地方。

建议海珠桥效仿呢种做法。

一年一度，年廿八开市，直至年初一凌晨——迎春花市！

各区花市门口都係牛，或者係似猪嘅牛。

最中意，越秀花市中心有个亭，亭上边有个靓女live弹古筝！弹得好好听！仲有古装版嘅《过云雨》！太有型！

见到一幅剪纸嘅“迎春接福”门挡，好靓，好有气势！

各花草树木农攞自己种嘅花草树木出嚟卖。

各种出自一德路一带批发市场嘅精品。

有个细路忍唔住，买咗把充气大锤就即刻攞出嚟摆pose。

幸好我哋仲有原创——泥塑公仔，好怀旧呢！

我喜欢咖啡，

但因为咖啡因敏感，

我不会喝咖啡，

我不是真心喜欢喝咖啡；

我喜欢巧克力，

但纯巧克力太苦，

我不吃纯巧克力，

我不是真心喜欢吃巧克力；

我喜欢电影，

但没有耐性看大片，

相反低质素的商业片则看得津津有味，

我不是真心喜欢看电影；

我喜欢新诗，

但连我自己也忍不住对自己大叫：

咪啦你！扮森美！

我不是真心喜欢新诗！

智慧齿，学名第三大臼齿。

我从旧年大学毕业到依家，短短一年时间入边，出咗三四只智慧齿！可能读完书、学够知识、储够智慧，就出智慧齿咖啦。

有位朋友话啲智慧齿搞到姖其它牙齿移晒位，第日姖囡囡出智慧齿就带姖剥咗佢！鉴生剥咗佢喎！虽然呢个设想crazy咗啲，但係都不无道理嘅！我都觉得啲智慧齿係喺一个我认为唔可以再出牙嘅地方长出嚟！几匪夷所思！本来无乜牙肉嘅地方长牙，就要借其它牙嘅牙肉嚟用。于是啲牙就逼逼逼，逼到好逼，继而侧身借位，就唔整齐噜！

我算好彩，出智慧齿唔痕唔痛唔发炎！我有另一位朋友因为出智慧齿发烧、面肿，最后要开刀将智慧齿取出。

智慧齿啲位置比较深入，我刷牙又刷得嗱咋，我觉得我啲智慧齿係长年得唔到应有嘅清洁嘅！十几廿年后，肯定会变成蛀牙！

无论如何，学千嬅话斋：三十二个，我通通都咁爱！