★☆薇薇薇薇薇☆★

实不相瞒，我有一张银行卡嘅密码係030905。呢张卡係储蓄卡同校园卡集于一身嘅一张卡，可以喺银行存钱攞钱，可以喺学校饭堂嘟卡买饭食。我喺2003年9月5号攞到呢张卡。

2003年9月5号，我同埋爸爸妈妈一齐，第一日去大学报到。我仲係我哋班第一个报到添！好多手续都要爸爸妈妈一齐同我办。两年之后我接新生嗰时，见到几个大人服侍一个细路嗰啲，我嘴藐藐咖。其实，我自己以前咪又係咁！我依家识自己事情自己做咖啦。

2003年9月5号，第一次feel到大学有几大！有大足球场，有大教学楼，有大草地，……估唔到大处未算大，大学城更加大。

小学升初中，初中升高中，我都会唔开心。当然，高中升大学都唔开心过一排！2003年9月5号，我都唔係好开心咖！其实几日之后，当我见到我班同学仔，我已经无唔开心啦。

2003年9月5号，有好多嘢我仲记得清清楚楚，仲有好多画面留喺我脑入边！

030905係我自己人生中一个阶段嘅开始。四年时间过得真係好快好快好快！见识好多嘢，经历好多嘢，学到好多嘢！

你仲记唔记得4年前嘅今日，中午嗰餐食咗咩啊？

我记得喎！2003年8月9日，我中午食咗蟹，下午仲发埋烧添！

唔使惊！唔係我记性好得咁紧要，而係从4年前嘅今日开始，我真真正正咁写日记。

日记，小学嘅时候写过。係因为啱啱学识写一啲字，要迫不及待咁表现下自己嘅文采。当时写咗一两个星期左右，停咗。中学时代，因为买咗本有锁嘅簿仔，唔写就嘥，又写过一两个星期。当时仲因为老师对我哋要有了解，逼我哋写周记，呢啲周记，当然敷衍了事。

4年前突然又开始写日记，係因为高考又考完、成绩又出咗、学校又派埋，百无聊赖，揾本软皮抄出嚟雕琢下我啲字。写下一年，写下又一年，写写下就四年啦。4年入边，唔係日日都咁精彩，唔係日日都咁有心机写。有意义起上嚟，写番一两版纸；无聊嘅都写低一两句。一定要keep住写，我知道我自己如果一停咗就唔会再写番。

4年，啱啱係我大学4年。大学4年比之前任何4年都丰富！识到好多人，学咗好多嘢，积累咗好多经验，体验咗好多经历！读大学，开始咗无掩鸡笼嘅学习生活；经历过非常唔开心，自己学会平衡番自己；开始听903，之后深深咁爱上，经常喺被窦笑到震畀人发现；住宿舍，学识点样真正同人相处，同埋学识点样求其洗干净啲衫；做干事做部长，从畀人管畀人指点到自己管人自己教人；搞大project，知道每件事都係从零开始；第一次过冬唔喺屋企，同班同学仔出去大排档打边炉；喺政府部门实习，体会到咩叫潜规则；在实验室里做实验，学识苦中作乐；影相，见人就影见嘢就影；大笑，比之前十几年嘅笑仲多；出嚟揾工，知道咩叫揾食艰难……18本日记写低嘅远远唔只呢啲。

4年前嘅今日，我一谂到又要转新环境入大学我就头痕。今日，我好高兴有呢4年嘅经历。

坚持，坚持，我会坚持写落去，再写第二个4年，第三个4年，……

影毕业相，谢师宴，毕业典礼，攞毕业证学位证。一样接一样。

大学四年，我谂，开心＞＞唔开心。

我觉得我係赶上一个“好时代”。

我大二嘅时候，我哋学院新成立。喺一个新嘅学院入边，好需要人手做嘢，所以我有幸做到学生干部。可以有好多时间直接跟老师做嘢，得到老师嘅指点。尤其係我哋嘅辅导员朱Sir！佢真係一个好好好老师！教咗我好多好实际嘅嘢！如果学院唔成立，我就要继续留喺人才济济嘅生化学院，终日无所事事，永远都唔知自己叻咩咖啦！做学生干部好辛苦，但係每做完一单大project睇番转头，或多或少都会学到嘢嘅！

我班书友都係一班好好嘅同学！女仔斯文贤淑聪明可爱，样样都有；男仔唔烟唔酒，个个彬彬有礼！从来未惊过会学坏！我哋学院嘅老师，亦都係好老师！虽然有啲教龄唔长，上课略为沉闷，但係都feel到佢哋都用心备课。帮我哋改作业、解答疑难从无托手踭，而且讲到我哋明为止。其中最好嘅，係常老师！学校学院有时会对我哋提出要求，我哋有怨言嘅时候，通常都係常老师籍住少少上课嘅时间嚟耐心咁听我哋发牢骚，解释畀我哋听点解学校学院要咁做，如果我哋跟住做对我哋有咩好处……我有幸跟佢做毕业论文，佢唔会一步一步笃住我哋做，只係我哋自己做，做到每一个阶段问佢倾一次指点下，再做，再倾……就因为佢唔会咩事都帮我哋解决，我哋成日赖嘢；就因为我哋成日赖嘢，我哋都学到好多嘢！

我哋专业有好多实验要做。所谓“入实验室揿紧急掣”。唔知点解我哋学院呢两年突然有好多经费，买咗好多设备。我哋有幸第一手用到呢啲仪器设备。我觉得啲仪器好夸咖，下下都几百万一台。都几惊咖！

读完大学，发现自己大胆咗！大三打后，有好多课程都要小组讨论，然后揾个人出嚟发言。有好多次我都逼我自己做代表出去讲。我知道我自己从细就係纯种嘅“怕死鬼”！于是，一有呢啲机会我就摆自己上台，一摆咗上台都无得缩咖啦。虽然我唔係全组入边讲得最好嘅一个，但係如果我唔讲，我永远都唔会讲得好！扮过无数次代表，我终于开始唔怕喺大家面前扮代表啦。好开心啊！

我觉得我哋都几小圈子。我哋7个广州嘅女生群埋一齐群咗四年。熟到好似屋企人咁。所有坏话都够胆死当面讲。

大一下学期，当时选选修课係“先到先得”为原则。我哋仲係走读，为咗选到心水嘅选修课，服务器六点钟开，我哋个个五点几各自就喺屋企起身上网，然后电联！边个快就帮其他人报！卒之嗰次我哋成功咗！但係我已经唔记得报咗咩课啦！

我好中意粘住屋企，但係读大学都早出晚归咁点算读大学呢？我亦係好好彩！走读咗两年就搬入大学城再住宿读两年。走读嗰时真係有啲不知所谓！我记得大一嗰时试过八个人上午上完课，中午喺学校食饭，下午去状元坊影贴纸相，张贴纸相就係得八个头！走读同其他同学好少交流，有啲除咗打招呼甚至无正正式式倾过偈。

好彩，好彩后尾可以搬入大学城，可以住宿！一齐喺宿舍倾偈、食嘢、做功课、睇戏、搞事……好玩到呢！喺宿舍最开心就係倾偈，因为我哋长大嘅环境都差唔多，加上我哋已经识咗两年，大家熟到不得之了，所以总係有讲唔完嘅嘢，从朝早起身讲到晚黑瞓觉。最典型嘅大学卧谈会当然有开过啦，谈咗几日，就无晒声，大家一上床就瞓到猪咁。喺宿舍最唔开心就係人哋瞓觉我都无得瞓，因为要做嘢。不过呢啲都係我自己嘅经历，我自己嘅收获嚟嘅。

入咗大学城我自己做咗好多匪夷所思嘅嘢：晚黑九点几落去打篮球；朝早八点几无课上去咗打网球。做运动喎！除非被逼，如果唔係，我係唔会郁嘅。科技发达咗，我哋用手机影咗好多相，拍咗好多片！呢啲就係仲可以keep低嘅record。……四年，太多太多啦！讲唔完写唔晒！

毕业啦，再见啦，好开心嘅大学，好感激各位喺我大学四年出现过嘅朋友，多谢各位！

终于完成咗大学学习嘅最后一环——答辩！

比我想象中轻松好多！

上午公开答辩。非常好彩，我无被抽中。不过上午所谓嘅公开答辩，都只不过係我哋学院嘅主要嘅老师，做评委老师，加埋我哋学院两个毕业班嘅同学仔，总共先至一百人左右，参加呢个公开答辩。老师会提问题，同学仔识答嘅就答，唔识答嘅会有啲啲尴尬，但係老师都会帮手打完场。

下午小组答辩，人人有份永不落空！我第一个答辩。开始之前我仲有少少紧张，得到企咗上讲台，突然又有一种好熟悉嘅感觉！台下有三位老师，同埋我哋班啲同学仔。简直就好似之前一啲课程嘅小组讨论总结环节。我用咗10分钟介绍论文。讲讲讲。老师提咗两个我哋一早就发觉我哋篇论文有破绽嘅问题。老师啲语气都唔係好强硬，只係用提示嘅口吻。我答唔出，啲老师仲惊过我，猛话“不要紧的，别紧张。交流一下而已。”诶，老师，我没有紧张，您也别紧张。

因为讲台位无风扇，一路讲我一路feel到有汗顺住我背脊流落去，热到我呢！担泥咁！

讲番我篇毕业论文。其实从开始采样到最后答辩，前后两年时间！唔係我哋认真勤力，啱啱相反，係我哋喺度hea。辛苦晒我哋嘅指导老师两年係咁时不时畀我哋打扰，指导咗我哋咁耐！

好轻松好轻松！估唔到咁轻松！我不嬲都知道我哋学院嘅老师好人，估唔到好到咁！感谢各位老师四年嘅教导！

听日就係6月5号世界环境日。咁快又一年。

谂番一年前嘅6月5号，我仲喺环保局实习，请咗一日假番学校帮手同埋参加我哋学院搞嘅环境日活动。嗰次好大阵像，又请领导又请记者……嗰日上午都OK好天，但中午落过一阵雨，我哋好惊会影响个活动，好彩喺开始之前一个钟就停雨。天气同今日差唔多。我仲记得我嗰日只左眼发炎，生咗一粒暗疮喺下眼睑，小小痛。好奇怪！都一年前嘅事，仲好似琴日发生咁！

呢一年真係好快好快好快！环保局实习完之后，又去咗好多地方参观实习。Hea咗一个暑假之后，以为无咩课上，点知啲课仲密过大一大二嘅时候，成班人牙痛咁声。仲要遇著学校要接受本科评估，无拉拉又要做强化实验。辛苦到呢！但係所有事情都“会过去的”。到后半个学期，我哋再可以过上清闲少少嘅日子。转眼到咗寒假。我用咗半个月喺设计院实习，换嚟一个极之唔好嘅感觉，过完年之后放弃继续实习。然后喺屋企磨烂席磨咗三个月，期间去过三次面试，前两次我自己都无心，所以衰咗。我好庆幸前两间公司唔收到我，因为我几中意第三间公司。

我觉得拣得做，就要做好佢。所以呢排又恢复到高中阶段嘅生活，日头上课training，晚上温书整理note屎。我嘅师父都话：辛苦开头呢几个星期嘅时间，以后嘅工作就可以顺顺利利。辛苦就辛苦啦，所有嘢都“会过去的”。

一话影相，我哋都会乱到九彩咁！次次都係，著咩衫，化唔化妆，点样笑……

今次堪称“六国大封相”。试嗰套衫已经非常搞。套衫无码咖！套套都加大码咁嘅！尤其我咁鬼矮，著咗之后无手无脚，好恐怖！件学士袍又deep V嘅！顶帽虽然有码，但係S都係大到非常！个样仲衰！化妆，化完就出油，一晒一热就溶妆！笑C我！不过，开心嘅！

我先嚟介绍下呢只袋鼠嘅背景资料：

佢係一只袋鼠形状嘅笔袋。佢make in China，出厂后被运到Australia。又喺Australia嘅商店被一位从广州去Australia读书嘅男仔买咗，带住佢坐飞机飞番嚟广州，送咗畀佢喺广州嘅女朋友。笔袋，当然用嚟装笔啦。个女仔带住个笔袋番学，可惜遇人不淑，姖有一班好搞事嘅同学，上课嘅时候，姖啲同学趁姖唔注意，就向只袋鼠伸出魔掌，佢嘅命运开始悲惨……

我终于知道点解啲Rapper大都係反政府主义者。当你对一样嘢不满嗰阵，满脑嘅负能量就会爆发。

我瞓喺张床度，唔够10分钟，就谂到呢首词。虽然好粗劣，但係算係我第一首Rap词。

当然君子动口不动手，但係我唔係君子。不过我係又反动又怕死嗰种人。所以——呢度讲呢度散！

献丑啦！

关于评估我净係想讲六句：

八点半同点十之后唔畀入睡，

就算无课你都要遵守规矩。

各种各样嘅规条好鬼累赘，

时时刻刻分分秒秒可以入你罪。

呢排番学真係觉得非常冇趣，

评估，究竟係对定唔对？！

PS：其实我一直觉得Rap同中国嘅打油诗係异曲同工，押韵咋嘛。不过我有咁嘅谂法，会唔会好老土呢？！

在实验室里当然做实验啦！不过呢，从初中到大学，做过无数次实验，到近几个月我哋做实验，仲係惊险万分，相当刺激！

呢排，我哋因为将要要畀人评估，学校的我哋做啲“强化实验”，即係将以前做过嘅实验重新做一次。做啲咁嘅实验，我哋次次都可以搞啲可大可小嘅事出嚟，唔知係啲实验本身恐怖，定係我哋係恐怖分子。喺呢十几次实验入边，就发生过n次恐怖事件！

魔头-LLL煲窿水事件。我哋要做一个名为“水体富营养化程度的评测”实验，要加硫酸同过硫酸氨入去啲水度，然后攞啲水去个电炉度煲煲煲！LLL同学有事出去，叫魔头同学睇火；点知一阵之后魔头同学又有事出去，无叫人睇火。突然间，我哋闻到好酸嘅酸味！你可以入厨房攞个装醋嘅樽嚟闻下，我哋当时闻到嘅酸味酸过醋酸十倍！佢哋煲窿做啲水，仲煲穿咗个锥形瓶！！！啲酸吱一声，蒸到成间实验室都係！就係好似喺屋企点香薰咁，一蒸，成间房都係嗰阵味！真係闻一闻好精神，索一索舒筋活络！

超净工作台辣亲手撞板事件。超净工作台其实係一个透明柜，得两个窿可以伸两只手手入去做嘢。做实验之前，开入边盏紫外线灯杀菌，然后关咗盏灯，就可以喺入边做嘢。做嘢嗰时要点盏酒精灯，我就无拉拉鬼揞眼，只手掂到酒精灯个灯头辣亲。辣亲就梗係缩咖啦，点知我两只手係卡住咗喺嗰两个窿度，一缩就撞咗落个柜块板度！仲有“拗痕撞板事件”，情况同“辣亲手撞板事件”类似，不过我係突然觉得个鼻鼻好痕，想伸手去拗，点知又係撞板！

生化危机事件。我哋喺实验室见到人哋喺个培养皿度培养啲菌培养得咁好，就打开个培养皿嚟睇下。点知老师话我哋：“这些培养皿不能打开的，因为你不知道里面是什么菌。如果是一些危险的菌种，就出事了。”好彩！我哋嗰啲只不过係细菌啫，只要揾只大菌食咗佢就得。谂谂下又係播！万一係H5N1或者SAS或者AIDS……咁咪死！！！

倒水入硫酸事件。我攞一只啱啱用嚟量完浓硫酸嘅量筒去洗，我居然攞啲啲水倒入只量筒度，啲水滚起咗！我仲放喺我视平线位置睇发生咩事！低B！好彩只量筒好高，无弹到啲酸出嚟！好彩啫！

倒酸手痕事件。试过好多次，洗啲装过酸嘅容器，多多少少有啲酸掂到只手。如果浓度高，就会有啲痛；如果浓度低，就会觉得手痕！于是就喺实验室搽啲洗洁精猛冲水，冲到好似冲凉咁至无事。

甩皮事件。试过连续几个星期做一个要掂硝酸同氢氟酸嘅实验，两只手掌都甩皮！后尾做完呢个实验，就无树喇。好彩啫！

虽然发生过咁多恐怖事件，我仲可以喺度写blog。每次出事之后我都会讲一句：“好彩啫！好彩啫！”真係多得上天嘅庇佑同埋死好命，我至生存到依家！

我发觉我某啲时候都係一个多口妹嚟嘅！如果够瞓、够精神、又同啲比较熟嘅朋友一齐，把口就唔收！

多口，唔知好定唔好。不过，喺呢啲讲无聊嘢嘅过程，我自己发明咗一啲terms。呢啲terms真係好屎！但係，除咗屎，我都仲係觉得自己都叻叻哋咖！

惹火尤物

代词。代指嗰啲好容易惹人发火嘅人。

呢类朋友，平时无问题。但係有时若果佢哋未瞓醒或者大脑转数突然急降，就好想窒佢哋、虾佢哋。

天幕上的工人

名词词组。同周丽淇、郑嘉颖主演嘅《天幕下的恋人》绝对无关系。意指喺天幕上工作嘅工人（即係无解过）。

学校在建嘅体育馆有一天幕设计。经过见到有啲无缆安全带嘅工人喺天幕上边行嚟行去，如履平地，令到畏高嘅我哋好敬佩！

蚊子怕的水（普通话）

名词词组。即蚊怕水。

因“蚊怕水”一词用普通话读比较拗口，所以本人发明咗呢个词嚟代替。

仲有两个老师嘅“称呼”（或者应该叫花名），又係几个人倾出嚟嘅产物，我觉得唔错！

翘老师（普通话）

呢位老师讲普通话嘅，几乎每个字都会发翘舌音。

带刀老师

大二同我哋上课嘅时候，见到佢腰间皮带上有抽锁匙，嗰抽锁匙中有把折叠嘅刀仔。皇上就私自封咗佢做“御前一品带刀老师”。为咗简洁咁称呼佢，就简称“带刀老师”。