★☆薇薇薇薇薇☆★

《假如生命剩下N小时2》同1一样，都係以三粒精子嘅思考作为第一幕。然后再配上三幕分别讲述三位唔同年龄阶段、唔同处境女性嘅故事。最后一幕係今年比较火热嘅歌唱比赛，河东狮嘅各位演员当然施展自己嘅看家本领，係咁扮其他著名歌手！

其实我觉得故事就麻麻地吸引嘅，两个钟头五幕戏基本上係无关系，因为我自己中意睇重剧情、连贯嘅舞台剧。不过第五幕《真实的谎言》好有水准！Feel到赵荣将个角色演得好有感情！而且个结局都几峰回路转！

当然，河东狮对于我嘅吸引并唔係喺剧本上，而係佢哋嘅本地原创！

只要满足以下条件：1、广州人；2、年轻嘅广州人；3、心境年轻或者真係年轻嘅广州人；4、识听识讲广州话心境年轻或者真係年轻嘅广州人；睇过一次河东狮嘅作品之后，大都会继续睇第二次！每次演出嘅本土元素都令大家拍烂手掌！

今次都唔例外，佢哋嘅笑位好係广州日常接触到嘅嘢，我谂经过几部舞台剧，思诺应该已经揾到一条属于广州舞台剧嘅路，越嚟越识带动观众气氛同情绪！我最中意第三幕结束嗰时，光磊借助角色当时嘅情绪大嗌：“熄灯！散场！鼓掌！”于是全场又一阵热烈嘅掌声！

仲有，要赞一赞中山纪念堂。因为南方剧院需要装修，于是今次《N小时2》嘅首映选喺中山纪念堂举行！去过黄花岗、南方、纪念堂睇舞台剧，发现差别都几大，有啲音响“拆”嘅、有啲位有蚤嘅越坐越痕、有啲空调唔够嘅，纪念堂係效果最好、最舒适嘅一个场馆！睇都睇得开心啲啊！

10月31号万圣节喺黄花岗剧院继续有《N小时2》嘅rerun，错过咗嘅朋友敬请留意喇！（注：我无收广告费）

好荣幸可以参与河东狮组织嘅第一次会员交流活动。活动安排喺一间两面都係镜嘅排练室举行，好有feel！

吴家亮、富丽、邱光磊、李健、梁铁欣、谭俊颖、Rocky等一班河东狮演员喺佢哋“老大”思诺嘅主持下，我同我哋面对面分享舞台心得。除咗Rocky，感觉上其他几位演员都比较内敛，好似讲两句说话都会面红嘅感觉！从佢哋嘅讲话中，我估佢哋自己都有一份正式嘅工作，参与河东狮演出係佢哋嘅副业。如果真係咁样，可以交出依家嘅演出成绩实在难得！

之后达明都加入，讲咗少少佢从事演艺事业几十年嘅心得！

从佢嘅分享之中，我明白咗一个我谂咗好耐嘅问题：点解内地嘅舞台剧同香港舞台剧有咁大分别？

原来，内地大部分嘅戏剧教学都係建基于俄国戏剧大师史坦尼斯拉夫斯基（唔准笑！）嘅戏剧係由内到外（都话唔准笑咯！）理论，大部分舞台剧工作者都係循住呢个方向去创作、表演。而香港嘅舞台剧工作者会更加受欧洲新浪潮嘅影响，表现更加自由更富创造性，好多时可以由外到内，先表现出嚟再返回内心。

哎！唔好瞌眼瞓住，讲啲精神嘢！

达明分享完之后，就同我哋玩戏剧教学游戏。我睇PIP网页、睇电视见过詹Sir哋玩呢啲游戏，觉得好有趣！第一次有机会亲身参与，导师仲要係之前一晚至睇完佢演出嘅达明先生，好开心！

一共玩咗两个游戏！

第一个就係按照达明指令模仿唔同人嘅行路方法。听落好简单？非也！

25岁嘅人：好简单，咪就係我啰；

45岁嘅人：《同事三分亲》入边嘅戴安娜；

85岁嘅人：驼背吧，震震下；

15岁嘅人：嗯……应该跑得好快；

15岁300磅嘅人：呃……肥到行唔郁……都仲行得郁吧；

45岁250磅嘅人：唔……肥係肥啲，手脚都中可以fing fing下嘅；

85岁250磅嘅人：吓……又肥又驼背又手腾脚震；

佢不断咁讲，我不断咁回忆，睇嚟我平时嘅观察都唔够仔细。

继续——

喺水度行，啲水到膝头哥；

喺水度行，啲水到心口喇；

喺啲好杰嘅水度行；

喺啲好杰嘅水度，但係係喺月球上嘅。

哈哈！好有趣！要靠我哋自己嘅想像力！大家有兴趣不妨自己喺屋企试下。

第二个游戏达明请咗一位朋友离场，然后同我哋讲解我哋所处嘅情景，再请翻嗰位朋友入嚟睇我哋嘅演绎，估翻我哋究竟发生咩事。

第一个场景，我哋全部人喺一条奴隶船上，我哋都係奴隶，出咗去嗰位朋友係奴隶主，佢净係可以买一个奴隶走，无畀人买走嘅人只会继续喺船上受苦。我哋唔可以讲嘢，净係可以用动作嚟表达。

第二个场景，我哋一班旧同学聚会，出咗去嗰位朋友係我哋其中一位旧同学。但係姖嘅屋企人啱啱因为车祸过咗身，我哋要等姖先生嚟埋至同姖讲呢个消息。

原来戏剧，参与其中嘅感觉真係好唔同、好有趣！我唔会做演员，但係戏剧游戏都可以令人会以不同角度接触事物、感受生活、享受创意！

原来PIP（Pleasure Imagination Play 喜悦·想像·游戏）係形容得咁贴切！

好好玩啊！下次有机会再玩过！哈哈！

单睇个名《容易受伤的女人》，好容易令人联想到男女感情嘅舞台剧，睇完至发现係《真情》嘅舞台剧版！记唔记得边出《真情》啊？“笑声笑声，满载温馨”嗰出呢！当然无蓉姨善姨好姨等一班耆英啦，我嘅意思係，呢出舞台剧係讲亲情嘅！通过焦媛同达明嘅演绎，表达焦媛同爸爸、达明同仔仔之间嘅情谊，主题係“爱得太迟”（对！古巨基嘅《爱得太迟》）！有啲位都几煽情，睇到我都眼泛泪光！

呢出舞台剧嘅selling point係“栋笃笑歌舞喜剧”，“栋笃笑”由达明负责，“歌舞”由焦媛负责。两人互有分工，成个剧表演得好流畅！

以王菲嘅《香奈儿》开始，焦媛一共唱咗28首王菲嘅歌。我唔係Fay嘅fan，好多歌我都唔熟，呢样我反而觉得係好处，因为焦媛始终唔係王菲，姖嘅演绎方式同王菲完全唔同，焦媛嘅唱腔係有啲美声唱法吧，如果听惯Fay再听焦媛可能会有啲别扭，但係完全唔熟嘅我无乜嘢，当新歌咁听啰。焦媛真係一位资深嘅舞台剧演员，歌、舞、戏全部都功力深厚！

喺我眼中，舞台剧嘅达明係正过栋笃笑嘅达明！毕竟佢喺香港舞台剧界都攞过唔少奖项，并唔係浪得虚名！今次将栋笃笑融入舞台剧就恰到好处喇！每十句八句台词就有一个笑位，啱啱好！而且，达明更加係一位比焦媛更资深嘅舞台剧演员，佢竟然可以将佢嘅招牌表演——“扮速龙”摄入剧中，真係拍烂手掌！同埋呢，佢又摄啲“广州特色”入剧中，当然都成为咗一个个猛烈嘅掌位啦！

睇过《万世歌王》，睇过《容易受伤的女人》，感觉香港舞台剧係比内地嘅高一个层次嘅，唔知咁讲啱唔啱，但係我真心觉得係。服装、灯光、道具、布景、演员、编排、节奏等等都好一气呵成嘅！因为现场唔畀影相，所以我可以好认真咁睇。焦媛几层楼高嘅长裙、飞满成个台嘅纸碎、漫天飞舞嘅泡泡、旋转木马、……好多好多场景都做得好靓！舞台背景用咗投影幕，剧情推进到某啲位，焦媛喺台前唱歌，后面嘅投影幕就播住一啲画面。呢啲可能因为香港社会畀舞台剧好高嘅自由度，另外好多舞台剧工作者都曾经到过外国深造，学到百老汇嗰套做法翻嚟吧。

谢幕嘅时候，达明除咗要读各赞助商同埋制作单位之外，仲介绍咗今晚何冲（08奥运跳水冠军）同吴嘉亮都嚟咗！我心谂，吴嘉亮你真係要学习下啦，相比起两位前辈，你嘅演技可以话係流于表面！其实，河东狮有好嘅剧目、好嘅剧本，就係缺少咗一班够火候嘅演员啫！不过话翻转头，够火候嘅演员都係从一次次稚嫩嘅演出中成长起嚟嘅！

我谂起之前无记播过嘅《好戏一台》，係介绍相关舞台剧工作者嘅。当时我觉得好吸引，今次睇完发现：係啦！我就係想睇呢种舞台剧啦！《容易受伤的女人》实在係好优秀嘅香港舞台剧！如果广州再有rerun嘅话，十粒星推荐！

期待已久嘅“谢安琪呐喊广州演唱会2009”经已圆满结束！

今次係我第二次喺广州体育馆睇concert，可能最近见得Kay太多，姖喺台上出现嘅一刻，我完全无毛管栋嘅感觉，反而好似睇紧一位朋友做show，有戥姖开心嘅感觉！

唱歌，跳舞，弹琴样样做齐，连无谂过嘅吊高都做埋！

当晚人才济济，有好多嘉宾：SPEED CREW、BanBanMusic仝人、徐子崴，不过我最buy嘅都係SPEED CREW！今次都係我第二次（又係第二次？！乜咁岩啊！）睇佢哋表演，上次《当梁山伯爱上潘金莲》斋睇阿牙，今次佢哋倾巢而出！精彩！

现场有两个大mon，用嚟播即场take嘅安琪大头同埋安琪唱嘅歌词，可以跟住扮唱卡拉OK！

为咗迎合广东观众，Kay唱咗好多人哋嘅国语K歌，唱少咗自己嘅Kay歌，搞到我哋听唔够喉！睇完总係感觉无高潮过，真可惜！其实大可不必，就算姖成晚唔唱，斋哼自己嘅歌，我哋都咁中意听咖喎！

无论如何，好多谢安琪精彩表演！我哋都拍烂手掌咖！

一直好留意詹Sir嘅演出，可惜佢嘅舞台表演净係喺香港，只能够捧佢嘅电影场。今次《万世歌王》嚟广州演出，终于有机会欣赏詹Sir嘅舞台演出，未出发先兴奋！

《万世歌王》畀我嘅感觉同以往任何一场其他单位嘅表演都唔同！因为詹Sir真係一位artist，表演艺术家！佢喺舞台上係会发光嘅！

对于睇詹Sir嘅show，一半係冲住搞笑，一半係欣赏香港舞台剧艺术而去嘅。《万世歌王》係一部“舞台剧”，係叫做“一人舞台剧”！台前，詹Sir嘅声音、声线、表情、动作、舞蹈、服装，所有嘅综合起嚟；加上幕后嘅灯光、舞台设计、道具配合，好出色！比我之前睇过任何一场舞台剧都出色！

个个都话詹Sir嘅表演浮夸，其实舞台表演就係要浮夸！喺剧场入边，表演者只有寥寥几位，但係观众却有成百上千，要将剧中嘅信息传达畀剧场每一位观众，无翻啲剧力点掂呢？！所以我真心觉得，舞台剧係唔可以制成DVD畀人睇嘅，咁样反而会令观众对舞台剧有误解；舞台剧係一定要去现场欣赏表演者每一场独一无二嘅演绎！

我睇嗰场係《万世歌王》第80场演出，亦係PIP第1次喺内地嘅演出，能够参与其中，我觉得好荣幸！之前听《嘩嘩嘩》，詹Sir讲过旧年PIP啱啱成立嘅时候遇到嘅危机，今日我可以坐喺广州睇到PIP嘅show，都係佢哋团队努力嘅成果！

成个show可以话係“形散而神不散”，有好多part、好多唔同嘅表现形式、好多唔同嘅演绎，都係围绕“流行曲”，唔係斋好笑，係有message嘅！

好啦，讲完正经嘢，开始讲无聊嘢喇！

我好中意个舞台！舞台好鬼minimalism（咁样讲会唔会太作状？！哈），左右各一块幕墙、背后又有一块连住地面可活动嘅幕墙，中间有一张宫廷沙发。根据剧情，配合各种灯光、幕墙嘅移动，造就出好多种场景效果！

最后一幕，詹Sir＋mic-stand＋烟雾＋灯光，有型到爆炸！

其中有一幕，係讲外国人成日将个“我”字摆喺嘴唇边，英文歌总係唱I、me、my、myself呢啲字。但係中文歌好少唱“我”字，如果唱嘅话，通常都要加个“有”字喺后边，跟住詹Sir就唱咗“我我我我我有胸部，练练练练练我路”！我梗係当堂拍烂手掌啦，但係可惜好多人都未听过，有少少冷场。连詹Sir都话“哎呀！走宝啦！”

詹Sir要饰演唔同嘅角色，都换咗九万几套唔同嘅服装！除咗服装配合，詹Sir嘅声线都开行turbo，係咁转係咁转，“一人分饰九饼”嗰幕，好劲！同埋有一幕佢分别饰演大帅同佢嘅奴婢“莎拉”，一个虐待一个被虐，同时饰演两个人，真係好笑到无朋友！

《万世歌王》真係好精彩！PIP真係好有heart！除咗詹Sir，PIP仲有一位演员我係好想睇嘅——虾头，杨诗敏！希望下次佢哋再嚟广州演出，可以欣赏到晒佢哋啦！

係啊！阿Kay又嚟广州做宣传啦！姖呢期真係“宣传之达人”！我又见到姖啦！好开心！

老土嗰句“贵人出门招风雨”，姖嚟广州做宣传，台风都嚟埋！好彩无吹走Kay，无吹走我哋！所有活动都如期举行。

下午先喺流行前线《天生快活人》户外直播室同有“广州森美”之称嘅林颐做节目。好开心啊！

可惜我哋之间有隔膜——玻璃，反光哦！影相都唔靓添！

之后喺天娱广场有啤酒公司赞助嘅8月广州演唱会宣传活动。

呢度无隔膜啦，好嘢！影相都靓啲呀！

同场仲有BanBanMusic唱作新人Cousin Fung！净係听个名唔识唔紧要，具体啲，佢係《17度》、《祝英台》、《如花》嘅作曲人，係关耀哥《你当我什么》嘅编曲！啊！《你当我什么》啊！劲中意！Woo～Woo～有前途啊呢个仔！

天娱广场除咗中庭有宣传活动用嘅大backdrop之外，抬头望上去，仲有上极都上唔到画嘅《保持爱你》大灯箱海报！劲啊！

Kay仲喺白忙中抽时间帮我哋签名同合照！

多谢晒您，Kay！亲切态度，甜美笑容，眼神迷人，有礼貌有素质有文化！

多谢夏生、云妮！

本来今次题目想用《宣传之达人：Kay》，因为5月30号见过姖一次，事隔一个月都唔够，又可以再见第二次，我见Kay仲密过见我啲朋友啰！咁勤力，都係为8月份广州演唱会努力啫！

今日参加完广州邮政嘅形象代言人press con之后，真係忍唔住要再用《Nice之达人：Kay》呢个题目嘅升呢版，忍唔住要再盛赞——超级nice之达人：Kay！之所以要用呢个升呢嘅题目，係因为我发觉唔单只Kay个人nice，连姖身边嘅同事、歌迷会嘅朋友仔都好nice！

呢个press con商业活动一个啰，成个过程无咩特别，都係发下言、签下字、握下手、合下影咁。Press con全程Kay都係望住发言嘅领导！劲有礼貌！劲有教养！

今日Kay都唱咗两首歌，《年度之歌》同旧年嘅年度之歌《囍帖街》。好好听啊！我做咗我听歌最中意做嘅嘢——一路跟住唱一路fing手！狂fing手！Fing咗一首半歌！

“谢安琪个性化邮票”都係今日发售，由于时间关系，Kay全部都事先签好晒名（右上）。整套邮品据说都係“阿刘刘家辉辉仔Sunny Lau”（少爷占係咁介绍佢嘅）设计，但係我真係唔係好信出自Sunny手笔，啲色调娘到爆！我之前买嗰本《903 ON SUNNY DAY》几型啊！不过当中红底烫金字嘅postcard（右下），真係好似一张“囍帖”咁！呢个可以畀翻一只手指公设计者！反而我哋都认为function上用于交换仪式嘅poster（左）仲靓啰！

今次係第一次同歌迷会嘅朋友仔一齐出function，个个都係后生仔好好倾好好人！Press con完咗之后，Kay去咗后台接受采访吧，我哋喺翻礼堂入边影相倾计。

Kay采访完咗之后，出嚟同我哋合照啊！啱好同我哋几个歌迷会嘅朋友仔一齐，好开心呢！ 

影完之后，姖仲同我哋逐一握手！我同姖握完手之后，畀姖对大眼仔电亲，电到我讲唔到嘢！姖好礼貌笑住咁同我讲咗句：“多谢！”全程保持笑容！

呢个过程完咗之后，一位制作公司嘅高层一位高贵嘅女士，希望我哋尽快疏散，不断咁同我哋讲：“乖喇乖喇！”哈！好好啊！

今日Kay经理人夏森美先生都有过嚟，佢都係劲nice人！同我哋歌迷会嘅朋友仔倾下广州演唱会嘅嘢，又同我哋合影！非常有耐性！PS：夏生今日著得好型！好尊重个场！ 

今日係我去过咁多次function之中最舒服最开心嘅一次！多谢Kay！多谢夏森美！多谢歌迷会嘅朋友仔！

终于等到30号，谢安琪歌友会！

今次活动由中国移动同音乐之声主办，我仲以为会由“云妮广州嘅朋友多乐斯”嚟主持添，点知唔係！係我喺广州电台就听嘅韦永坚同埋琳琳主持。

谢安Kay今日全黑打扮，豹纹打底衫、黑色运动修身外套、黑色荷叶边短裤、黑色高踭短筒boot，相当有型！发型方面，保留咗之前好正嘅泡泡头之外，仲加咗啲荫添，成个Kay后生晒！

而韦永坚则坚持佢嘅“白马王子”打扮。我发觉佢好多时都著成咁样！

因为今次打正旗号係商业活动，自然要讲无数次佢哋嘅slogan、玩啲指定嘅游戏、搞几轮大龙凤，阿Kay全程配合！有fans上台玩游戏，请姖自拍，姖又配合；同fans合照，姖又大方一齐影；又会主动同大家握手；……由头笑咪咪笑到尾，真係好nice！呢样嘢我真係好敬佩姖！娱乐圈咁至衿捞咖嘛！

搞大龙凤之余，Kay当然会唱歌啦！短短一个半钟嘅活动，姖唱咗五首歌：大碟主题曲《呐喊》、最近热播歌曲《年度之歌》、之前热播歌曲《祝英台》、我最喜爱的歌《钟无艳》、旧年嘅年度之歌《囍帖街》！好开心，可以听到live嘅《钟无艳》，真心开心！Kay嘅Live好得！仲有好多add lip添！我自己暗地里封姖为“add lip天后”啊！（“add lip天王”係由“方张组合”分获，好嘢！）

8月广州演唱会，再听过您live add lip啦！

要再讲一讲我对思诺嘅印象，始于《飞星传真》年代，当年仲叫《飞星传真》，当年星航哥仲未做电视台嘅主持，小珍珠仲未做电视台嘅趣剧。我印象好深，一出叫《不要说爱我》嘅广播剧好好听，甚至可以媲美张小娴嘅小说！编剧就係思诺。每个星期有一两日，姖会同星航哥、小珍珠一齐开咪做节目，姖把声都几好听！

07年开始，南方剧院就开始陆续有《假如生命剩下N小时》、《爱你爱到锡死你》、《幸＋惨》呢几部舞台剧上，编剧、导演都係思诺，就係我以前都几中意听嘅思诺！但係我都无睇过！

直至《当梁山伯爱上潘金莲》5月9号首映之前嘅一个月，本来打算5月9号去香港睇阿Kay红馆演唱会嘅我买唔到飞，同时又收到河东狮嘅短信话呢出舞台剧5月9号首映会员可以5折购票，咁啱我嗰日又喺佢哋公司附近，于是我就上咗佢哋公司买飞！

第一次咁近睇舞台剧，我谂我同台上嘅演员距离大概只有20米，就算个咪坏咗，我都仲听到佢哋讲嘢。舞台剧同电影真係好大分别！可以互动嗰下真係好过瘾！台下有咩风吹草动，台上嘅演员即刻可以有反应，真係好amazing！我觉得舞台剧每一次公演都係新嘅，每一次演员嘅对白、走位都唔一样，每一次都可以加啲新嘢入去。例如，我睇嗰晚，李金心就喺电话度叫程朗“偷人参”，喺开心网度偷人参啊！呵呵！

编剧嘅构思、演员嘅演技、舞台嘅背景同灯光效果都好好！一位女性编剧，而且仲係广州人，加上全粤语演出，全场都有共鸣到爆！呢啲就係广州原创嘅威力！ 两个钟嘅《当梁山伯爱上潘金莲》，确实係笑声不断，高潮迭起。桥就无谓喺度穿喇，不过都想讲最深刻嘅一段，女人就“边有猫唔食鱼”畀出咗一个答案——“Hello Kitty”；男人就话“Hello Kitty係因为无嘴，先至唔食鱼，因为佢唔得！”。

唯一美中不足嘅係佢哋嘅配乐，几次都係突然起突然收，有啲突兀；同埋我感觉佢哋嘅配乐都係从网上下载嘅，风格唔够统一，音质参差不齐！

原来我以前真係孤陋寡闻，原来广州嘅舞台剧演员都有呢种水平！佢哋个个都压到台，又识执生，又可以随时同台下互动推高观众嘅情绪！非常厉害！

谢幕嘅时候，上台除咗一众演员上台之外，仲有导演兼编剧思诺、创作顾问雷宇扬、半年之前喺广州做过show嘅达明，仲有仲有仲有一个我谂都未谂过佢会喺度嘅人——詹Sir詹瑞文！詹Sir盛赞广州本土嘅舞台演出之余，仲即席表演咗一段扮King Sir讲旁白添！真係好惊喜！

我谂我以后会更加支持广州原创，支持自己友！

知道今日農夫嚟广州，我都专程去恒宝！廿几岁人仲去睇商场show，真係……

令人意外嘅係，原来除咗農夫之外，仲有“堕落珍”嘅“珍”——Dear Jane！同埋佢哋live嘅《别说话》，live band＋live唱，都好好喎！可惜音响差咗啲！

相信在场九成半人都係睇農夫嘅！太嘈太多人，基本上都听唔到佢哋讲咩，但係到唱歌环节气氛真係好good！当然啦，佢哋无live band，净係得MMO。最最最好嘅，就係唱《举高只手》，大家都收埋相机举高只手一起唱！真係几开心！

仲有，佢哋真人同上镜一样靓！我第日都唔会去睇商场show咖啦，好辛苦！完！